Pas humbjes me Poloninë, Fico kujtohet për stadiumin
Drejtoresha e ISHP-së flet për pjesëmarrjen e 22 mijë tifozëve në stadium. Paralajmëron shtim të rasteve të infeksionit
Pjesëmarrja e rreth 22 mijë tifozëve në stadiumin “Air Albania”, në ndeshjen e së martës mes Shqipërisë dhe Polonisë mund të çojë në rritjen e shifrave të infeksionit.
Paralajmërimi u bë nga drejtoresha e Institutit të Shëndetit Publik njëherazi anëtarja e Komitetit Teknik të Ekspertëve, Albana Fico. Nga Universiteti “Aleksandër Xhuvani” në Elbasan Fico tha se çudia do të ndodh nesër, me më shumë të prekur nga COVID-19, më shumë të shtruar në spital dhe me më shumë fatalitete. “Kjo vjen për masa që nuk respektohej. Për faktin se shkohet tek arena me 22 mijë tifozë. Pritet nesër çudia historike. Në fakt, pritet rritje e të prekurve nga infeksioni të ndjekur nga shtrime spitalore dhe persona që vdesin me ato mënyrat që i kemi shpjeguar me ato numra që i kemi shpjeguar disa herë me 10-15 në ditë. Çdo njeri vlen. Çdo njeri është nëna, baba, motra dhe vëllai i dikujt tjetër. Me përgjegjësi personale ju them se kemi rritje të rasteve dhe në moshat deri në 30 vjeç, ata njerëz që mund ta kenë kaluar dhe pas 5-6 muajsh kanë dëme. Post COVID-in ne nuk e kemi të studiuar. Shifrat sot janë të qarta, ka popullata të tëra të vaksinuara dhe ka akoma infektime por nuk ka vdekje, pasojat e ‘Long COVID’-it janë një kosto shumë e madhe”, tha Fico.
KONTRADIKTA Por në fakt, çudia më e madhe është kjo deklaratë, që vjen pas humbjes së ndeshjes. Nëse qeveria apo Komiteti Teknik i Ekspertëve do të shqetësohej për situatën, atëherë do të vepronte në kohë, duke ndërmarrë masa për ta parandaluar grumbullimin e 22 mijë tifozëve. Por, një gjë e tillë jo vetëm nuk ndodhi, por për më tepër mbushja e stadiumit mori dritën jeshile nga Ministria e Shëndetësisë. Një ditë para ndeshjes, Federata e Futbollit dha lajmin për shitjen e 22 mijë biletave, ndaj edhe mbushja e stadiumit nuk ishte e befasishme.
VAKSINIMI Prej së hënës, Ekspertët e Institutit të Shëndetit Publik kanë nisur një tur nëpër të gjitha universitetet publike dhe private në vend për të bindur studentët që të vaksinohen. Sipas udhëzimit të ndryshuar të Ministrisë së Shëndetësisë, pedagogët dhe studentët janë të detyruar që për të marrë pjesë në auditorë, të paraqesin certifikatën e vaksinimit, në të kundërt do të duhet që një herë në javë të kryejnë testin për të konfirmuar që nuk janë të infektuar e për pasojë, nuk paraqesin rrezik për të infektuar të tjerët.