Duma: “Becchetti” dëm prej 120 milionë eurosh, aq sa paketa e krizës së energjisë

Nënkryetarja e Partisë Demokratike, Grida Duma, ka deklaruar se çështja “Becchetti” i shkakton 120 milionë euro dëm buxhetit të shtetit, sipas saj, e njëjtë me paketën që qeveria do të vendosë në dispozicion për përballimin e krizës energjetike. “Është habi e madhe si vini këtu dhe na kërcënoni ne për vjedhjet tuaja. Keni gjetur një çengel, avokatura e shtetit. Çështja në arbitrazh është mbyllur, 120 milionë do paguhet nga Shqipëria. Ndaj kemi kërkuar komision hetimor sa parlamentar, aq dhe politik. Ju kërkoni mosndërhyrjen tonë për ndërhyrjen tuaj. Dhe na thoni se ku e kemi gjetur vendimin. Kemi një dëm 120 milionë euro aq sa është dhe paketa juaj për përballimin e krizës energjetike. Sepse ne vuajmë shpesh nga memoria e shkurtër, për të kujtuar se si keni ndërhyrë ju. Ky individi që po trajtohej çështja “Becchetti”, del në emisione dhe thotë se na ka bërë dëm. Është një sagë mashtrimesh për hakmarrje politike”, tha Duma. Nga ana e saj deputetja Jorida Tabaku deklaroi se rritja e borxhit publik me 100 milionë euro, nuk ka lidhje me pretendimet e maxhorancës socialiste për vaksinat dhe përballimin e situatës së lindur nga pandemia, por bëhet për të paguar PPP-të dhe oligarkët. “Çfarë ka sot rritja e borxhit me 110 milionë euro?! Ka 1 milionë për vaksinat. Ka për Teatrin Kombëtar. Janë duke sfiduar edhe Gjykatën Kushtetuese duke i dhënë fonde Bashkisë së Tiranës për Teatrin Kombëtar. Janë duke kaluar fonde për mirëmbajtje për AKSH-in. Janë duke kaluar fonde dronët. 38 akte normative, ndryshime kanë bërë vitin e kaluar, tha këshilltari i presidentit, 28 këtë vit. Çfarë është kjo?! Është paaftësi?! Është arrogancë?!”, tha Tabaku dje në Kuvend.