Pandemia, KLSH: Menaxhimi i situatës s’ishte efektiv

“Kapacitete spitalore të pamjaftueshme e vonesa në testim”

Vonesa në kryerjen e testimeve, mosfunksionim i spitaleve dhe laboratorëve rajonalë, miratimi me vonesë e urdhrit për rimbursimin e pacientëve të infektuar me COVID-19 dhe deri tek fondet e pamjaftueshme janë vetëm një pjesë e problematikave të konstatuara nga Kontrolli i Lartë i Shtetit mbi menaxhimin e pandemisë. “Menaxhimi i COVID-19 në vendin tonë nxori në pah problematikat e shumta të sistemit shëndetësor, si: kapacitete spitalore rajonale të pamjaftueshme për trajtimin e rasteve me COVID-19, funksionimin jo të mirë të qendrave shëndetësore të njësive të vendore të kujdesit shëndetësor, kapacitete profesionale të specialistëve të sëmundjeve infektive në kujdesin shëndetësor parësor shumë të kufizuar, fonde financiare pamjaftueshme, mangësi në stokun e materialeve të mbrojtjes personale (MMP-ve), pamjaftueshmëri në trajnimet e stafit mjekësor, pasiguri në vendin e punës, etj. Përballë një virusi të panjohur, shoqëruar me humbje jete të njerëzve, menaxhimi i situatës nga sistemi ynë shëndetësor, nuk ishte shumë efektiv”, thuhet ndër të tjera në raportin “Efektiviteti i menaxhimit të situatës pandemike COVID-19” të kryer nga KLSH-ja për periudhën nga 4 shkurti i këtij viti deri në 11 prill. Në dokumentin me 76 faqe vihet në dukje po ashtu se “shpenzimet nga xhepi për shëndetësinë ishin të larta si për personat e siguruar, ashtu dhe për personat e pasiguruar, gjë e cila ngre pikëpyetje dhe mbi efikasitetin e skemës aktuale të sigurimeve”. “Mungesa e fondeve të mjaftueshme për shëndetësinë është një nga sfidat më të mëdha me të cilat është përballur sistemi shëndetësor në vite, ndërkohë që popullata është ende larg përftimit të një shërbimi shëndetësor cilësor dhe falas. Mungesën e fondeve për sistemet shëndetësore e vuajnë familjet shqiptare, me shpenzimet e drejtpërdrejta (nga xhepi) të larta dhe që nuk mbulohen nga Sigurimet Shëndetësore”, theksohet më tej në raport. E vonuar është konsideruar paketa e rimbursimit të ilaçeve për pacientët e infektuar. “Nga kontrolli në disa qendra shëndetësore, komunikimi me mjekët e familjes, si dhe intervistat me pacientë COVID pozitivë, grupi i auditimit konstatoi se ky rimbursim nuk është kryer në masën 100%, pacientët nuk kanë qenë në dijeni të këtij informacioni, duke mos harruar dhe faktin që çmimet e barnave në Shqipëri shpesh janë më të larta se në vendet e tjera të BEsë44 . Kjo vërtetohej nga numri i vogël i recetave të lëshuara nga mjekët e familjes, gjë e cila na u komunikua në disa nga qendrat shëndetësore”. Nga ana tjetër, është kritikuar edhe “Strategjia VjeshtëDimër”. Sipas KLSH-së, mungojnë planet konkrete të veprimit, personat përgjegjës, afatet kohore, si edhe buxheti përkatës në realizimin e aktiviteteve të parashikuara.