GJKKO rrëzon kërkesën për pezullimin e ekzekutimit të vendimit për Llallën
Gjykata e Posaçme kundër Krimit dhe Korrupsionit ka rrëzuar kërkesën për pezullimin dhe shtyrjen e ekzekutimit të vendimit për dënimin e ish-kryeprokurorit Adriatik Llalla me dy vite burg. Kërkesa për shtyrjen e ekzekutimit të vendimit ishte bërë ditën e premte nga avokati i ishkryeprokurorit, për shkak të gjendjes shëndetësore të këtij të fundit. Më 8 tetor, Prokuroria e Posaçme kundër Korrupsionit dhe Krimit të Organizuar përfundoi procedurat ligjore dhe shpalli në kërkim ndërkombëtar ishkryeprokurorin Adriatik Llalla, tashmë i dënuar me 2 vite burgim. Një ditë para Policia i ktheu përgjigje SPAK-ut për Adriatik Llallën pas kërkimeve që rezultuan pa sukses. Policia i është përgjigjur me një shkresë zyrtare Prokurorisë së Posaçme kundër Krimit dhe Korrupsionit, ku e informon se ish-kryeprokurori nuk është gjetur. Policia thotë se ka bërë të gjitha verifikimet me metoda speciale, por nuk e ka gjetur, ndaj dhe i ka kërkuar Prokurorisë së Posaçme që të nisë procedurat për ta shpallur Llallën në kërkim ndërkombëtar. Nga verifikimet, Llalla rezulton të jetë larguar jashtë vendit pak ditë para shpalljes së vendimit të Gjykatës për ta dënuar atë me dy vite burg dhe për t’i konfiskuar pasurinë, ku menjëherë pas kësaj ai u shpall në kërkim kombëtar. SPAK është detyruar të nisë procedurat për shpalljen në kërkim ndërkombëtar të Llallës, menjëherë pas marrjes së shkresës nga Policia. SPAK i është përgjigjur shkurtimisht interesimit të gazetarëve lidhur me çështjen, duke thënë se: “SPAK-u është duke bërë procedurat që parashikon ligji. Detajet nuk mund të bëhen publike”. Ish-kryeprokurori, Adriatik Llalla, për të cilin është firmosur një urdhër arresti më 22 shtator, ditën kur Apeli i dha formë të prerë vendimit të dënimit të tij me 2 vite burg, rezulton të jetë larguar nga Shqipëria më 9 shtator. Sipas të dhënave të sistemit TIMS, ai është larguar nga Rinasi në drejtim të Italisë, por nuk dihet se cili ka qenë destinacioni i tij përfundimtar. Edhe pse formalisht, duke qenë se të paktën zyrtarisht Llalla nuk ndodhet këtu, nga verifikimet e Policisë
në adresa të ndryshme, ai nuk është gjetur. Pas vendimit të dhënë nga Gjykata e Posaçme e Apelit, SPAK-u i kërkoi Policisë arrestimin e Adriatik Llallës dhe në mbrëmje, pak orë pas vendimit, ata zbarkuan në shtëpinë e tij por pa e gjetur. Në një kohë kur ende nuk është konfirmuar nëse është arratisur apo është larguar për shkaqe shëndetësore nga Shqipëria, burimet thanë se Llalla nuk do shpallet vetëm në kërkim kombëtar, por me shumë mundësi pritet të shpallet edhe në kërkim ndërkombëtar, duke qenë se është konfirmuar nga sistemi TIMS, se ai është larguar jashtë Shqipërisë, por nuk dihet vendi final i tij.