Oficerë shqiptarë në komandën e “Guardia di Finanza”
Arbore: Do sjellë koordinim dhe bashkëpunim më efikas
Drejtori i Përgjithshëm i Policisë së Shtetit, Gledis Nano, priti në takim delegacionin e lartë të Guardia di Finanzas, të kryesuar nga Gjeneral Brigade Giuseppe Arbore, drejtues i Repartit III të Komandës së Përgjithshme të Guardia di Finanzas. I pranishëm në takim, edhe ambasadori i Italisë në Shqipëri, Fabrizio Buçi. Gjatë takimit u vlerësua bashkëpunimi i deritanishëm dhe domosdoshmëria për ta thelluar më tej këtë bashkëpunim. Ndërsa Arbore tha se Policia shqiptare do të ketë një përfaqësues në komandën e Guardia di Finanza, gjë që sipas tij do të sjellë koordinim e bashkëpunim më efikas mes policive të dy vendeve. “Forcimi i bashkëpunimit, domosdoshmëri për rritjen akoma më shumë të forcës goditëse ndaj kultivimit dhe trafikimit të lëndëve narkotike dhe trafiqeve të paligjshme”. Ky duket se ishte thelbi i takimit, për të cilën ranë dakord të dy palët. “Mirënjohje për punën e shkëlqyer që ekipi juaj po bën në Shqipëri, për monitorimin ajror, që ka si qëllim parandalimin dhe goditjen e kultivimit të bimëve narkotike. Ju falënderoj për bashkëpunimin e deritanishëm dhe ju shpreh gatishmërinë dhe vullnetin tim personal dhe të Policisë së Shtetit, për forcimin e këtij bashkëpunimi, pasi lufta kundër kultivimit të kanabisit është një nga prioritetet kryesore të qeverisë shqiptare dhe një sfidë personale e imja si Drejtor i Përgjithshëm i Policisë së Shtetit, për ta luftuar deri në zhdukje këtë paligjshmëri, ndaj kërkoj me shumë sinqeritet mbështetjen dhe bashkëpunimin tuaj. Vlerësoj punën e përfaqësuesve të Interforcës në Shqipëri, për koordinimin e veprimeve dhe shkëmbimin e informacionit në kohë, për parandalimin dhe goditjen e tentativave për trafiqe të paligjshme”, u shpreh drejtori i Policisë, Gledis Nano. Drejtuesi i Repartit III të Komandës së Përgjithshme të Guardia di Finanzas, Gjeneral Brigade Giuseppe Arbore, në emër të delegacionit, i uroi Drejtorit të Përgjithshëm Gledis Nano suksese në detyrën e re dhe i ofroi mbështetje për realizmin e prioriteteve në interes të të dy vendeve. “E vlerësoj shumë dëshirën dhe vullnetin tuaj për të bashkëpunuar dhe në përgjigje të kërkesës suaj, pa hezituar, menjëherë ju ofroj që një përfaqësues i Policisë së Shtetit të vendoset në komandën e përgjithshme të Guardia di Finanzas, gjë që do të sjellë koordinim dhe bashkëpunim më efikas mes Policisë së Shtetit dhe Guardia di Finanzas”, u shpreh Arbore. Në takim u ra dakord që në muajin nëntor të zhvillohet një konferencë e përbashkët për të bërë prezente rezultatet e arritura përgjatë vitit 2021 në kuadër të monitorimit ajror për evidentimin dhe goditjen e kultivimit të bimëve narkotike.