Konflikti me armë te parku, pranga njërit nga të plagosurit
Policia zbardh ngjarjen, ndalon dy autorët e dyshuar dhe një e shpall në kërkim. Arrestohet në spital edhe Aleksandër Nikolla
Zbardhet ngjarja e ndodhur pasditen e së mërkurës në zonën e ish-parkut të autobusëve në Tiranë, ku mbetën të plagosur me armë zjarri shtetasit Aleksandër Nikolla dhe Xhulio Vela.
Policia tha dje se brenda pak orëve u kapën dhe u vunë në pranga 2 nga autorët e dyshuar të ngjarjes, si dhe u shpall në kërkim autori i tretë i ngjarjes, të tre me precedent të mëparshëm penal, njëri prej tyre me masë sigurie “Arrest në shtëpi”. Në pranga u vu edhe njëri prej të plagosurve, për veprën penale “Moskallëzim krimi”, ndërsa u sekuestrua një armë zjarri pistoletë, e dyshuar e përdorur në ngjarje.
POLICIA Policia e Tiranës tha dje se specialistët për Hetimin e Krimeve në Komisariatin e Policisë nr. 2, në bashkëpunim me strukturat hetimore të Policisë, pas një pune intensive hetimore për zbardhjen e ngjarjes së ndodhur pasditen e djeshme, në kryqëzimin e rrugës “Ndre Mjeda” me rrugën “Frosina Plaku”, kanë bërë të mundur identifikimin dhe arrestimin e autorëve të dyshuar, konkretisht shtetasit: Farjon Palushi, 27 vjeç, aktualisht me masë sigurie “Arrest në shtëpi” për veprën penale “Prodhimi dhe shitja e narkotikëve”; Daniel Manushi, 27 vjeç, i dënuar më parë për veprën penale “Vrasje me dashje” e mbetur në tentativë. U shpall në kërkim si autor i tretë i dyshuar i ngjarjes, shtetasi Islam Xhetani, 28 vjeç, i dënuar më parë për veprën penale “Vrasje me dashje” e mbetur në tentativë. “Këta shtetas, ditën e djeshme (të mërkurën), rreth orës 17:00, në kryqëzimin e rrugës ‘Ndre Mjeda’ me rrugën ‘Frosina Plaku’, në bashkëpunim me njëri-tjetrin, dyshohet se kanë plagosur me armë zjarri shtetasit Aleksandër Nikolla, 28 vjeç dhe Xhulio Vela, 26 vjeç, të cilët ndodhen në spital, nën kujdesin e mjekëve. Nga veprimet hetimore dyshohet se ngjarja ka ndodhur si pasojë e një konflikti të çastit, për motive të dobëta, midis autorëve të dyshuar dhe shtetasve të plagosur”, tha zyrtarisht Policia. Në vijim të veprimeve, u bë dhe arrestimi në flagrancë i të plagosurit Aleksandër
Nikolla, 28 vjeç, për veprën penale “Moskallëzim i krimit”. “Gjithashtu, falë veprimeve të shpejta, shërbimet e Policisë bënë të mundur gjetjen e armës së zjarrit pistoletë të përdorur në vendngjarje nga autorët e dyshuar. Nën drejtimin e Prokurorisë, vijon puna hetimore për dokumentimin e plotë të ngjarjes”, thuhet në njoftim.
HETIMI Ka dyshime se konflikti ka nisur mes dy grupeve të rinjsh, ku pas debatit verbal sherri ka degjeneruar në përdorimin e armëve të zjarrit. Të rinjtë janë konfliktuar në trotuarin pranë një pallati. Nga kjo ngjarja mbetën të plagosur 28-vjeçari Aleksandër Nikolli dhe 26vjeçari Xhulio Vela. Policia njoftoi zyrtarisht se në kryqëzimin e rrugës “Ndre Mjeda” dhe “Frosina Plaku”, në rrethana ende të paqarta, janë plagosur dyshohet me armë zjarri shtetasit A. N., rreth 27 vjeç dhe Xh. V, rreth 25 vjeç, të cilët ndodhen në spital, nën kujdesin e mjekëve. “Shërbimet e Policisë kanë ngritur pika kontrolli dhe po bëjnë kontrollin e zonës përreth vendit të ngjarjes, me qëllim identifikimin dhe kapjen e autorit. Njëkohësisht, grupi hetimor po punon për mbledhjen e të gjitha provave që do çojnë në identifikimin e autorit dhe dokumentimin e plotë të ngjarjes”, tha zyrtarisht Policia e kryeqytetit të mërkurën.