Dodik “kërcënon” Bashkimin Europian me shkëputje nga Bosnja
“Nëse Bashkimi Europian merr vendim për sanksione kundër Republikës Sërpska, ose për përjashtimin e saj nga programet që i ka këtu, le ta dijë se një gjë e tillë do të ishte data e pavarësisë së Republikës Srpska”, tha të enjten anëtari serb i Presidencës trepalëshe të Bosnjës, Milorad Dodik. Pas takimit të autoriteteve të Republikës Sërpska dhe ambasadorëve të BE-së në Sarajevën Lindore, Dodik tha se paralajmërimi i tij nuk paraqet kërcënim për integritetin territorial të Bosnje e Hercegovinës. “Ne nuk jemi kundër integritetit territorial të Bosnjës, por jemi për pozicionin kushtetues të Bosnjës. Nëse ata mendojnë se mund të kërcënojnë me sanksione, atëherë ne kemi të drejtë në vendimet tona politike. Ky do të ishte reagimi ynë dhe aspak kërcënim”, tha Dodik. Ai shtoi se Republika Sërpska do t’i merrte të gjitha masat për të rikthyer kompetencat e saj kushtetuese, gjë që, sipas tij, nuk do të ishte shkëputje. Sipas tij, ky proces “nuk mund të ndalet nga Komisioni Europian, Shtetet e Bashkuara të Amerikës, apo britanikët”. Takimi i së enjtes u mbajt pas një bllokimi tremujor të institucioneve të Bosnjës, sepse përfaqësuesit e Republikës Srpska e bojkotojnë punën e institucioneve qendrore që nga mesi i korrikut. Kjo, pasi ish-përfaqësuesi i lartë ndërkombëtar në Bosnje, Valentin Inzko, vendosi një ligj që e dënon mohimin e gjenocidit dhe krimeve të tjera të luftës. Dodik e ka kundërshtuar ashpër këtë ligj. Ai, prej kohësh, ka bërë thirrje për shkëputjen e Republikës Sërpska nga pjesa tjetër e Bosnjës, ndërsa së voni, ka thënë se serbët e Bosnjës do të tërhiqen nga ushtria e përbashkët e vendit. Mediat në Bosnje kanë raportuar se disa anëtarë të Parlamentit Evropian kanë kërkuar nga komisionari për zgjerim i BE-së, Oliver Varhelyi, të vendosë sanksione kundër Dodik, për shkak të bojkotimit të institucioneve shtetërore të Bosnjës.