Kurti: Do luftojmë kundër kontrabandës me çdo çmim
S’e shkarkon ministrin serb: Do përbënte një çështje që e nxit Beogradi
Kryeministri i Kosovës, Albin Kurti, ka arsyetuar aksionin e 13 tetorit të Policisë dhe Doganës së Kosovës kundër kontrabandës së mallrave, duke thënë se për stabilitetin e institucioneve dhe sundimit të ligjit “nuk mund të ketë stabilitet të krimit”. Për këtë qëndrim Kurti ka edhe mbështetjen SHBA-së, Gjermanisë e Mbretërisë së Bashkuar, por jo të kryediplomatit europian, i cili e cilësoi si një aksion të njëanshëm në Veri të Kosovës, edhe pse në fakt aksioni u zhvillua në disa qytete të Kosovës, jo vetëm në veri dhe ishte në bashkëpunim me KFPR-në. “Ne luftojmë me grupet kriminale që janë multietnike, siç janë edhe shqiptarët, boshnjakët dhe serbët. Ne do të luftojmë kundër saj me çdo çmim. Për shembull, dje në mëngjes kishte një aksion në katër komuna të ndryshme në Kosovë: Pejë, Prishtinë, Mitrovicën e Veriut dhe atë të Jugut ku kriminelë të ndryshëm shqiptarë dhe serbë kanë bashkëpunuar”, tha Kurti më 14 tetor në Shkup, ku po merr pjesë në samitin e organizuar nga “The Economist”.
Më 13 tetor, autoritetet kryen një operacion kundër kontrabandës së mallrave. Ky operacion u prit me protesta dhe bllokada në Mitrovicë të Veriut dhe Zveçan. Dhjetë policë u lënduan dhe dhjetë qytetarë kërkuan ndihmë mjekësore. Autoritetet e rendit po ashtu njoftuan se kanë arrestuar tetë persona të dyshuar se janë të përfshirë në kontrabandë, ndërkaq kanë shpallur në kërkim edhe dhjetë persona të tjerë. Si në mesin e të arrestuarve, ashtu edhe të atyre që po kërkohen, shumica janë shqiptarë të Kosovës.
Kryeministri Kurti po ashtu tha se ky aksion nuk duhet të politizohet, pasi sipas tij, edhe për zbatimin e të njëjtit ishin të përfshirë prokurorë serbë, por edhe policë të përkatësisë serbe. “Mendoj se është shumë keq të politizohet lufta jonë kundër krimit. Duhet të bashkëpunojmë me të gjithë në Ballkanin Perëndimor kundër krimit të organizuar, i cili është shumë më i integruar sesa që jemi ne”, deklaroi Kurti. Policia e Kosovë tha se gjatë aksionit të 13 shtatorit ka sekuestruar mallra dhe dëshmi në vlerë prej qindra mijëra eurosh.
Aksioni u përdor si mundësi për viktimizim nga serbët e Kosovës. Të mërkurën ata vendosën barrikada dhe sulmuan policinë me granata dore. Nisja e vendosjes së barrikadave në atë zonë u bë prej një kompanie në pronësi të Rakiç. Ai tha se veç ajri s’po iu merret serbëve të Kosovës dhe e ka krahasuar situatën me “Natën e Kristaltë”. “Nuk mund të durojmë më, ka mbetur vetëm ajrin të na e marrin, kjo ka qenë si Nata e Kristalit për ne, ky takim me Vuçiçin është më i rëndësishmi, është derdhur gjak serb mbi xhamat e thyer”, tha Rakiç. Deklarata e tij nxiti reagimin e ambasadorit gjerman në Kosovë, Jorn Rohde. “Ndaloni! Krahasimi i aksionit të sotëm të policisë me ‘natën e kristaltë’ është i papranueshëm. Krahasime të tilla kontribuojnë drejt rrëfimeve të shtrembërimit dhe mohimit të Holokaustit”, ka shkruar ambasadori gjerman. “Nata e Kristaltë” e quajtur edhe “Nata e Xhamit të Thyer” e 9 dhe 10 nëntorit të vitit 1938, ishte nata kur nazistët gjermanë sulmuan hebrenjtë dhe pronat e tyre.
Zyra e Kryeministrit të Kosovës, reagoi se udhëheqësit e Serbisë, duke mos arritur t’i kthejnë serbët kundër qeverisë së Kosovës, po tentojnë që të nxisin konflikte përbrenda qeverisë. Kurti ka vendosur të mos e shkarkojë ministrin Rakiç pasi nuk e konsideron atë si një çështje. Por, konsideron të tillë shkarkimin e tij.