Fjalimi i Sozës: Ja si do t’i mundim shqiptarët

Përgatitja e skuadrës polake për ndeshjen ndaj Shqipërisë kishte një përqendrim shumë më të madh nga trajneri dhe lojtarët sesa në ndeshjet e tjera. Kjo për faktin se dihej edhe se sa e rëndësishme ishte ajo sfidë. Ditën e djeshme në mediat e huaja është publikuar një video e një analize të detajuar që trajneri i polakëve, Soza, bën me lojtarët e tij para ndeshjes me Shqipërinë. Ai analizon deri në detaje si duhet të sillen në fushë lojtarët e tij, çfarë duhet të bëjnë që të vendosin shqiptarët në vështirësi dhe çfarë duhet të shfrytëzojnë për të fituar ndeshjen.

“Do të jetë një sfidë e madhe, ne duhet të kemi shumë disiplinë në fushë, shumë përqendrim, duke kontrolluar shumë mirë treshen e fundit të mbrojtjes shqiptare me mënyrën se si e lëvizin topin, gjithashtu një komunikim të mirë me tre mbrojtësit tanë dhe kontrollin e sulmuesve të tyre. Mbrojtësit tanë janë territorialë dhe do të kenë punë me ta. Ne duhet t’i ndjekim kudo në fushë ata, mesfushorët tanë duhet të kontrollojnë shumë mirë mesfushorët e tyre, sidomos në 1/3 e fundit të fushës. Duhet të kontrollojmë lojën, por më e rëndësishmja është të bllokojmë lojtarët kyç të atyre dhe të mos lejojmë që të luajnë me ta. Mos u bëni të verbër, që do të thotë se duhet të shikoni ato hapësira bosh që do të lënë. Gjithashtu, ju që kërkoni topin, mos u fshihni, por dilni në dritë që shoku juaj t’ju shikojë lehtësisht. Ne kemi mundësinë t’i vendosim ata në situatë dy kundër dy, ne kemi një sulmues të fortë, shfrytëzojeni atë dhe luani topin drejt tij. Luani topin në ajër, pasi jemi më të fortë se ata”, është shprehur në përgatitjen para ndeshjes me Shqipërinë trajneri Soza.