Vetingu e Reforma Territoriale, çështjet e konsensusit PS-PD
Ndryshimet kushtetuese kërkojnë 93 vota në Kuvend
Partia Socialiste do të kërkojë edhe votën e demokratëve për të kaluar në Kuvend ndryshimet në Kushtetutë sa i takon zgjatjes së mandatit të organeve të vetingut. Me vetëm 74 vota të saj dhe 3 të PSD-së, socialistët do të duhet të marrin edhe dakordësinë e demokratëve për të arritur të paktën numrin e 93 votave në Kuvend.
Por, Partia Demokratike e ka përjashtuar mundësinë e bashkimit të votave me PS-në vetëm për të ndryshuar mandatin e organeve të vetingut, duke propozuar hapjen e një diskutimi edhe më të gjerë për ndryshimet kushtetuese. Kreu demokrat i ka cilësuar gabim ndryshimet kushtetuese të 2008-ës dhe ka kërkuar ndërhyrje në të. Gjithashtu, demokratët kërkojnë që për të bashkëpunuar me PS-në në Kuvend do të zgjerojnë tematikat e diskutimit duke përfshirë si reformën zgjedhore, ashtu dhe reformën territoriale, të cilën PD-ja e braktisi në vitin 2015. Madje, në selinë e PD-së janë ngritur dy grupe pune për të nisur diskutimin publik dhe me ekspertë për këto dy reforma. Gazment Bardhi drejton grupin e punës për reformën territoriale dhe Enkelejt Alibeaj drejton grupin e punës për reformën zgjedhore. Për Kryeministrin Rama “Reforma në Drejtësi nuk është diçka për t’u negociuar, është diçka për t’u kryer dhe besoj që në këtë pikë, është shumë e qartë për të gjithë që kthim mbrapa nuk ka, që qëndrim në vend numëro nuk ka dhe kush i bie ndesh reformës në drejtësi, i bie ndesh interesave të vendit, i bie ndesh aleancave strategjike të vendit, i bie ndesh të ardhmes së vendit”. Bashkëpunimi mes PS dhe PD duke nisur nga mandati i organeve të vetingut, Reforma Zgjedhore që është një detyrim për implementimin e rekomandimeve të OSBE/ODIHR-it dhe rregullimet që mund t’i bëhen ndarjes territoriale, pritet t’i hapin rrugë një marrëdhënie të re mes maxhorancës dhe opozitës dhe pse kjo e fundit vijon të flasë për masakër zgjedhore më 25 prill, duke blerë dhe joshur me vende pune shqiptarët për tu marrë votën. Partia Demokratike ka akuzuar se ndarja aktuale favorizon Partinë Socialiste dhe kërkon ndryshimin e saj. Nga ana tjetër, socialistët me rihapjen e kësaj teme mund të rihedhin në tryezë një propozim të 2014-2015 për një reformë administrativo-territoriale më të thellë, që veç bashkive do të prekte edhe 12 qarqet. Nuk është më sekret që në PS mbështetet shkrirja e qarqeve dhe ndarja e vendit në katër rajone. PS e ka përgatitur terrenin për këtë, madje duke përfshirë edhe në Kushtetutë fjalën “rajon” me ndryshimet e kryera e kryera në korrik të vitit të kaluar. Reformimi i qarqeve është sugjeruar që në 2014 nga ekspertët dhe vetë përfaqësuesit e pushtetit vendor gjatë konsultimeve për reformën aktuale.