Kushtetuesja merr në shqyrtim dosjen “Meta”

PS kërkon shkarkimin e Presidentit për shkelje të Kushtetutës

Gjykata Kushtetuese ka marrë dje në shqyrtim vendimin e Kuvendit për shkarkimin e Presidentit të Republikës, Ilir Meta. Në njoftimin në faqen zyrtare, Kushtetuesja thotë se ka marrë në shqyrtim paraprak çështjen “Për shkarkimin e Presidentit të Republikës së Shqipërisë për shkelje të rënda të Kushtetutës” të kërkuar nga Kuvendi i Shqipërisë, në përputhje me afatet procedurale të parashikuara në ligjin e saj organik dhe në Rregulloren e Brendshme. Kuvendi votoi më 9 qershor 2021 për shkarkimin e kreut të shtetit shqiptar dhe miratoi me 104 vota pro raportin e Komisionit hetimor Parlamentar. Në raportin e këtij komisioni të votuar në Kuvend, Presidenti akuzohej për shkeljet të renda të Kushtetutës, përfshirje në fushatën elektorale të zgjedhjeve parlamentare të 25 prillit. Më konkretisht, raporti evidentonte shkelje të tilla si: Shkelja e betimit të Presidentit (neni 83/ 3), si rol ekuilibrues në jetën politikë të vendit; Shkelja e detyrimeve kushtetuese të Presidentit për të qenë përfaqësues i unitetit kombëtar (neni 86/1); Shkelja e detyrimeve kushtetuese për të mos ushtruar aktivitet partiak (neni 89 i Kushtetutës), pasi Presidenti është përfshirë direkt në fushatën elektorale, duke sulmuar maxhorancën, çka është e ndaluar në Kushtetutë; Cenimi i të drejtave kushtetuese të individëve, si cenimi i procesit zgjedhor, pasi Presidenti ka intimiduar votuesit duke thënë se ai vetë do t’u presë dorën, thirrje luftarake e vetëgjyqësie; Cenimi i sigurisë dhe rendit, pasi Presidenti ka bërë thirrje për dhunë gjoja në emër të mbrojtjes së votës, duke iu kërkuar qytetarëve që t’i mbrojnë me sfurqe; Cenimi i marrëdhënieve me partnerët strategjikë të Shqipërisë, pasi ka vënë në rrezik marrëdhëniet me Shtetet e Bashkuara të Amerikës dhe ka sulmuar ambasadoren amerikane, Yuri Kim; Cenimi i imazhit dhe reputacionit të vendit, pasi edhe ODIHR shkruan se Meta mban një marrëdhënie kritike dhe të ashpër ndaj qeverisë, duke ndikuar drejtpërdrejt në zgjedhje me tonet e tij konfrontuese edhe të nxehta në Gjykatën Kushtetuese është në shqyrtim vendimi i Kuvendit të Shqipërisë nr.55/2021, datë 09.06.2021 “Për shkarkimin e Presidentit të Republikës së Shqipërisë për shkelje të rënda të Kushtetutës”. Gjykata e ka marrë në shqyrtim paraprak këtë çështje në përputhje me afatet procedurale të parashikuara në ligjin e saj organik dhe në Rregulloren e Brendshme. Në përfundim të shqyrtimit paraprak të kësaj çështjeje, bazuar në nenin 62 të ligjit nr.8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, Gjykata vendosi: “Kalimin e çështjes për shqyrtim në seancë plenare publike, data e së cilës do të caktohet në përputhje me rregullat procedurale të gjykimit kushtetues”, thuhet në njoftimin e Gjykatës Kushtetuese. Pas shkarkimit nga Kuvendi, Kushtetuesja pritet të japë verdiktin përfundimtar për shkarkimin ose jo të Ilir Metës si President.