Gjykata vendos ekstradimin e shtetases amerikano-kanadeze
TIRANE - Gjykata e Tiranës vendosi dje për ekstradimin e amerikano-kanadezes Lyda Jolanda Harris, e vënë në pranga në gusht të këtij viti për mashtrim. Ka qenë vetë shtetasja amerikano-kanadeze që nëpërmjet avokatit Arben Prenga kërkoi ekstradimin e drejtpërdrejtë. Ajo akuzohet për mashtrim nga autoritetet amerikane dhe është ndaluar në Shqipëri vetëm pak para se të largohej në drejtim të Gjermanisë. Sipas hetimeve, Harris është e përfshirë në skemë mashtrimi të qytetarëve, duke u kërkuar vlera monetare me pretendimin se do të ndihmonin të afërm të tyre të sëmurë. Në dosjen hetimore kundër gruas thuhet se skema e mashtrimit përgjithësisht fillonte me një telefonatë ndaj të moshuarve amerikanë, të cilëve anëtarët e organizatës iu prezantoheshin si të afërm. Të moshuarve iu kërkoheshin para me pretendimin se nipi ose mbesa e tyre ishte në një rrezik të madh ose ishte përfshirë në një aksident dhe duhej të paguanin dëmet e aksidentit. Organizata ku bënte pjesë Harris ka marrë para nga viktimat. Në momentin që siguronte paratë, organizata i pastronte ato, përmes llogarive bankare, përfshirë edhe ato të Harris, ose duke u investuar në kriptomonedha.
Hetuesit federalë zbuluan se Harris kishte hapur llogari bankare që i përdorte për të pastruar paratë e marra nga viktimat e mashtrimit, duke i transferuar në kompani fantazma. Në shkurt 2020 Harris mori 29 mijë dollarë nga një kompani e regjistruar në emër të një të dënuari. Fondet u gjurmuan dhe janë të një 73-vjeçareje që ra pre e mashtrimit në Kaliforni.