Barna kontrabandë nga porti i Durrësit, arrestohet 31-vjeçari

Operacioni “Smart” sekuestron medikamente të ndryshme për koronavirusin. Dyshohet për rrjet të organizuar të trafikut

Një 31-vjeçar nga Fieri përfundoi në prangat e Policisë së Durrësi, pasi u kap duke transportuar medikamente të ndryshme mjekësore.

Policia bëri me dije se finalizoi me sukses operacionin e koduar “Smart” duke arrestuat në flagrancë shtetasin Marjus Lushka dhe procedoi penalisht porositësin e medikamenteve, shtetasin Albi Begaj nga Tirana. Mësohet se shërbimet e Policisë kanë ndaluar në lagjen nr.13, Durrës (jashtë rrethimit tëportit detar), automjetin me drejtues shtetasin Marjus Lushka. Gjatë kontrollit në mjet, Policia ka gjetur dhe sekuestruar një sasi të konsiderueshme medikamentesh të ndryshme mjekësore, paketime me “Rapid Test Antigen” dhe 3 aparate celularë. Sipas burimeve nga grupi i hetimit, dyshohet se në këtë veprimtari të paligjshme të jenë përfshirë edhe persona të tjerë, ndaj ky rast po hetohet me intensitet për të goditur këtë aktivitet të paligjshëm që gjeneron të ardhura të konsiderueshme për trafikantët, duke shmangur detyrimet ndaj shtetit.

OPERACIONI Operacioni u zhvillua nga strukturat e Krimit Ekonomik dhe Financiar, që kishin siguruar më herët informacione për këtë veprimtari. “Strukturat për Hetimin e Krimeve Ekonomike dhe Financiare në DVP Durrës, në vijim të punës për parandalimin dhe goditjen e paligjshmërisë, në bazë të informacioneve të mara në rrugë operative se një shtetas po transportonte medikamente mjekësore dhe sende të tjera të paligjshme, pa dokumentacionin përkatës, kanë organizuar punën dhe kanë finalizuar me sukses operacionin policor të koduar ‘Smart’, në kuadër të të cilit u arrestua në flagrancë shtetasi M. L., 31 vjeç, banues në Fier, për veprat penale ‘Kontrabanda me mallra të licencuara’, ‘Kontrabanda me mallra të tjera’ dhe ‘Tregtimi dhe transportimi i mallrave që janë kontrabandë’”, sqaroi Policia. Nën hetim në lidhje me këtë çështje tani është vënë edhe porositësi i kësaj ngarkese “Rapid Test Antigen”, shtetasi Albi Begaj. “Specialistët

për Hetimin e Krimit Ekonomik e Financiar në DVP Durrës proceduan penalisht për veprën penale ‘Kontrabanda me mallra të licencuara’, porositësin e medikamenteve, shtetasin A. B., 29 vjeç, banues në Tiranë”. Dy personat e proceduar si porositësi apo transportuesi nuk kanë preferuar të bashkëpunojnë me Policinë, por kjo e fundit është e bindur që pas tyre fshihen edhe persona të tjerë. Ndërkohë, materialet hetimore i kanë kaluar Prokurorisë së Rrethit Gjyqësor Durrës, për veprime të mëtejshme. Shtatë persona, përfshirë pronarë farmacish, u arrestuan në Tiranë pak ditë më parë, pasi akuzohen se gjatë periudhës së Covid-19, në bashkëpunim me njëri-tjetrin, shisnin medikamente të dyshuara kontrabandë. Operacioni “Përfitimi” u organizua pas 10 muajsh hetime.