“Po më ndjekin”, Policia parandalon krimin
Një 45-vjeçar kërkoi ndihmë, ndalohet makina me 3 vetë
Policia e Shkodrës ka parandaluar një ngjarje të mundshme kriminale duke vënë në pranga një person dhe proceduar penalisht 2 të tjerë. Mësohet se është bërë i mundur arrestimi në flagrancë i shtetasit Florjan Vasija pasi shtetasi me inicialet A.T, 45 vjeç, ka kërkuar ndihmën e Policisë duke qenë se dyshonte se prej disa ditësh po e ndiqnin disa persona të panjohur nga ana e tij, të cilët lëviznin me një automjet tip “Golf”. Policia ka bërë të mundur lokalizimin dhe bllokimin e automjetit të dyshuar, në fshatin Mjedë, ku gjatë kontrollit ka rezultuar se në këtë automjet qarkullonin tre shtetas. Gjatë operacionit janë sekuestuar dy armë zjarri, municion luftarak, lëndë djegëse benzinë dhe tre shkopinj bejsbolli. Policia njoftoi dje zyrtarisht se shërbimet e Drejtorisë Vendore të Policisë Shkodër, pas njoftimit të marrë për një sulm të mundshëm ndaj një personi, falë ndërhyrjes së shpejtë e profesionale, bënë të mundur parandalimin e një ngjarje kriminale në fshatin Mjedë, Bashkia Vau i Dejës. “Shtetasi A.T, 45 vjeç, banues në Mjedë Shkodër, ka kërkuar ndihmën e Policisë pasi dyshonte se prej disa ditësh po e ndiqnin disa persona të panjohur nga ana e tij, të cilët lëviznin me një automjet tip ‘Golf’”, tha Policia. Menjëherë pas njoftimit, strukturat hetimore dhe ato operacionale të Drejtorisë Vendore të Policisë Shkodër në bashkëpunim me shërbimet e Komisariatit të Policisë
Shkodër, kanë organizuar punën dhe falë veprimeve të shpejta e profesionale bënë të mundur lokalizimin dhe bllokimin e automjetit të dyshuar. Makina u bllokua në fshatin Mjedë, ku gjatë kontrollit ka rezultuar se në këtë automjet qarkullonin tre shtetas dhe në brendësi të saj Policia gjeti dhe sekuestroi tre shkopinj bejsbolli dhe një bidon me 5 litra benzinë. Po në vijim të kontrolleve, shërbimet e Policisë së Shkodrës në bashkëpunim me ato të Lezhës, gjetën në banesën e njërit prej këtyre shtetasve konkretisht, të shtetasit Florjan Vasija, banues në Dajç Lezhë, dy armë zjarri gjysmë automatike dhe 821 copë fishekë luftarak. Policia tha zyrtarisht se në vijim të veprimeve u bë arrestimi në flagrancë i shtetasit Florjan Vasija i dyshuar për kryerjen e veprave penale “Prodhimi dhe mbajtja pa leje e armëve luftarake dhe e municionit” dhe “Prodhimi, mbajtja, blerja apo shitja pa leje e armëve të ftohta”. Gjithashtu, janë proceduar penalisht në gjendje të lirë dy shtetasit e tjerë, Z. V., banues në Lezhë dhe E. D., banues në Tiranë, të dyshuar për kryerjen e veprës penale “Prodhimi, mbajtja, blerja apo shitja pa leje e armëve të ftohta”. “Nën drejtimin e Prokurorisë së Rrethit Gjyqësor Shkodër, strukturat hetimore të Drejtorisë Vendore të Policisë Shkodër vijojnë intensivisht punën për zbardhjen edhe dokumentimin e plotë të këtij rasti”, tha Policia e Shtetit.