Skandali me pagat, Rama: I gatshëm të shkoj në Prokurori
“Këtu ka një qëllim jo fort të vështirë për t’u kuptuar, për të krijuar konfuzion dhe për të nxitur destabilitet në vend”
Kryeministri Rama u kërkoi ndjesë dje qytetarëve për shqetësimet e krijuara nga databaza e pagave të tyre, ndërsa u shpreh i gatshëm të shkojë në Prokurori.
Gjatë një konference për mediat, Rama kishte dje edhe drejtoreshën e AKSHI-IT për të sqaruar publikun se cili ka qenë burimi i rrjedhjes së këtij informacioni. “Në radhë të parë, dua t’u kërkojë një ndjesë të gjithëve që janë shqetësuar me plot të drejtë për këtë ndërhyrje në këtë aspekt të jetës së tyre private dhe ndërkohë, dua ta nënvizoj që në fillim se kjo është një ngjarje, e cila meriton të hetohet imtësisht. Ajo është një miks i një grabitje të një pjese të të dhënave dhe i një manipulimi të tyre, nuk është databaza jonë. Unë me daljen e kësaj e kam një opinion të qartë. Në qoftë se Prokuroria do të dëgjojë opinionin tim, unë jam gati tua them. Nuk e them publikisht, se nuk dua të bëj politikë. Unë e kam shumë të qartë se për çfarë mund t’iu duhen pagat atyre që kanë hedhur në treg databazën e patronazhistëve”, tha Rama. Sipas Kryeministrit, qeveria do të bëjë publike masat e reja për të ruajtur bazën e të dhënave. “Do të dëshiroja të flisja për një vendim shumë të rëndësishëm që kemi marrë lidhur me një nismë të re të qeverisë për të rritur dhe çuar në një nivel tjetër ndërveprimin me qytetarët, por sot duke pasur parasysh edhe ngjarjen e daljes në kanalet e komunikimit ‘Whatsapp’ të të dhënave mbi pagat, e kam shumë të qartë që nisma do të humbte në vëmendjen tuaj dhe ndërkohë, me plot të drejtë opinioni publik do të dijë qëndrimin tim dhe të qeverisë lidhur me këtë çështje sensitive. Prandaj nesër me gjasë do të bëjmë një komunikim për nismën”, u shpreh Kryeministri Rama.
DESTABILIZIMI
Për kreun e qeverisë, pas patronazhistëve, edhe rrjedhja e të dhënave me pagat e shtetasve ka qëllime destabilizuese për vendin. “Uroj, shpresoj dhe i bëj thirrje organeve ligjzbatuese, Prokurorisë që ta kryejnë këtë hetim me të gjithë kapacitetet e tyre. Dhe nga ana tjetër, dëshiroj të ndaj me publikun se në këndvështrimin tim, nuk është e vështirë të shohësh se këtu ka një qëllim jo fort të vështirë për t’u kuptuar, për të krijuar konfuzion dhe për të nxitur destabilitet në një përpjekje që s’është e para. Dhe duke pasur parasysh, edhe deklaratat e bëra nga Foltoret e Kuvendeve të antikuvendeve, mund të mos jetë e fundit”, nënvizoi Rama. Prandaj, shtoi kreu i qeverisë,
“thirrja ime për Prokurorinë është që të hetojë duke kërkuar që të përgjigjen, jo vetëm të gjithë, pa përjashtim, inspektorët e tatimeve, të cilët kanë akses në sistemin e pagave, për arsye të punës. Ata që aktualisht punojnë në këtë sistem apo të tjerë që mund të jenë larguar ndërkohë nga ky
sistem, në periudhën nga të dhënat e nxjerra deri sot, por edhe ata që nga Foltoret e Kuvendeve të antikuvendeve paralajmërojnë zymtira të tjera”. Rama tha se, “dëshiroj të sqaroj se këtu kemi të bëjmë me një ndërhyrje, e cila natyrisht duhet hetuar deri në fund për prejardhjen e saj, por që
nga analiza paraprake, ngjan shumë më tepër si një ndërhyrje nga inflitrimi i brendshëm dhe jo nga inflitrimi i jashtëm, në formën e një sulmi kibernetik. Gjë që ndodh edhe kjo”. “Nuk jemi, as të parët, as të fundit, nëse i referoheni vetëm periudhës së fundit kohore. Pra, le të themi,
viteve 2019-2020-2021. Ngjarje të tilla kanë ndodhur në shumë vende me kapacitete shumë të larta edhe të mbrojtjes kiberentike, që nga SHBA-JA, Rusia, nga Britania e Madhe në Kanada, e me radhë, e me radhë. Dhe kjo është një sfidë e re e kohës”, tha Rama.