“Gërdeci”, Gjykata e Lartë rrëzon Mediun
I hiqet çdo pengesë SPAK që të hetojë ish-ministrin
TIRANE - Gjykata e Lartë rrëzoi dje ankimin e bërë nga ish-ministri i Mbrojtjes, Fatmir Mediu, kundër vendimit të Gjykatës së Apelit, e cila u shpreh në favor të rihapjes së procesit gjyqësor ndaj tij për rastin e shpërthimit në Gërdec 13 vjet më parë. Mediu, përmes avokatit të tij e kishte konsideruar vendimin e Apelit si “në shkelje të hapur të Kushtetutës”. Me vendimin e djeshëm, për Prokurorinë e Posaçme kundër Krimit të organizuar dhe Korrupsionit, SPAK-UT, nuk ka më asnjë pengesë që ta çojë çështjen për gjykim. Në përfundim të hetimeve në vitin 2009, Prokuroria e Përgjithshme e asaj kohe, ngriti ndaj zotit Mediu dy akuza për shpërdorim detyre ngriti akuzat e “Shpërdorimit të detyrës” kryer në bashkëpunim, dhe “Shpërdorim i detyrës” në bashkëpunim me subjekt ushtarak-kuadër komandues. Zoti Mediu megjithatë nuk u gjykua kurrë, duke qenë se ai rifitoi mandatin e deputetit pas zgjedhjeve të atij viti dhe Prokuroria, e cila duhej të kërkonte sërish autorizimin e Parlamentit, nuk bëri më një kërkesë të tillë. “SPAK-U ka regjistruar tanimë procedimin penale ndaj zotit Mediu dhe në gjykatë pritet të çohet pikërisht dosja e hetimeve të kryera deri në 2009 nga Prokuroria e përgjithshme”, raporton “VOA”. Prokuroria e Posaçme, më 29 tetor ka regjistruar procedim penal ndaj Fatmir Mediut, në cilësinë e ish-ministrit të Mbrojtjes, në kuadër të dosjes “Gërdeci”. Hetimet SPAK-U i ka nisur për veprat penale “Shpërdorim i detyrës”, kryer në bashkëpunim, si dhe “Shpërdorim i detyrës” në bashkëpunim me subjekt ushtarak, kuadër komandues, të parashikuara nga nenet 248 dhe 25 të Kodit Penal dhe 70/2 e 2 të Kodit Penal Ushtarak. Në zbatim të këtyre neneve, Mediu rrezikon deri në 8 vjet heqje lirie.