Harta e re gjyqësore, Çela shpjegon pse është e domosdoshme

Prokurori i Përgjithshëm, Olsian Çela, deklaroi se për shkak të zbatimit të Reformës në Drejtësi, harta e re gjyqësore është e domosdoshme. Duke shpjeguar disa nga arsyet, ai tha se te prokuroria problemi është i mprehtë, ndaj harta është domosdoshmëri për të pritur deri në plotësimin e sistemit me magjistratë. “Ka domosdoshmëri për hartën gjyqësore. Nevoja sot është ekstreme, për shkak të Reformës në Drejtësi që po zbatohet sot, procesit të vetingut. Kemi një numër gjithnjë e më të paktë të magjistratëve në disa nga gjykatat e prokuroritë kryesore. Te prokuroria problemi është i mprehtë, ndaj harta është domosdoshmëri për të pritur deri në plotësimin e sistemit me magjistratë. Ndaj, kjo është e vetmja zgjidhje. Së dyti, sa i përket infrastrukturës, mendoj se ka opsione për zgjidhje. Mendoj se mund të përballohet në fazën aktuale me përdorimin e godinave, që mund të jenë të disponueshme. Ne do të bashkëpunojmë me KLGJ-NË apo ministrin e Drejtësisë. Besoj se do të kemi mbështetjen e plotë, që do të sigurohen nevojat e prokurorisë, të paktën në fazën kalimtare, derisa në një plan afatgjatë të vlerësojmë edhe nevojat për ndërtimin e godinave të reja. Këto janë çështje që ngelen për t’u zgjidhur, por e nevojshme në planin afatshkurtër, nevojat imediate mendoj se mund të realizohen dhe prokuroritë do të kenë infrastrukturën e nevojshme për të ushtruar detyrën”, tha Kryeprokurori Çela. Teksa foli për vrasjet e fundit që kanë tronditur vendin, Çela tha se prokurorët kanë mbështetjen maksimale, ndërsa iu është kërkuar që të vlerësojnë maksimalisht ngjarjet e rënda dhe të bashkëveprojnë me SPAK-UN.