PD akuzon Berishën: Do sulmojë partinë me trafikantët
Reagon Komisioni i Rithemelimit: Ata që shembën regjimin në ‘90 nuk do të lejojnë asnjë derë apo hekur të mbajë peng vullnetin e tyre
Ditët e para të vitit të ri në Partinë Demokratike nisën me “hallet” e vitit që shkoi. Atmosfera festive e dy ditëve të para të këtij viti në kampin opozitar ia la vendin përplasjeve mes Pd-së zyrtare dhe grupit të “Foltores”.
Komisioni i ngritur në Kuvendin e 11 dhjetorit për rithemelimin e Partisë Demokratike akuzoi dje kryedemokratin Lulzim Basha se po izolon selinë e Pd-së nga demokratët. Ndërsa në vijim, deklarata e Komisionit të Rithemelimit paralajmëronte kreun e Pd-së se për demokratët më 8 janar, kur është paralajmëruar protesta, nuk do ketë bravë apo derë të blinduar që do t’i pengojë të futen brenda. “Deputeti Lulzim Brava e nisi Vitin e Ri me avazin e vjetër të izolimit. Pasi izoloi veten nga 4446 delegatë dhe 43 385 anëtarë që firmosën shkarkimin e tij ai ka vendosur në prag të protestës paqësore të demokratëve ta kthejë shtëpinë e tyre në bunkerin e vetmisë dhe pazareve të tij. Kështu, në një akt turpi dhe paniku të denjë vetëm për një parti të marrë peng ai ndërron brava dhe po vendos dyer të blinduara për të shndërruar shtëpinë e demokratëve, selinë e Partisë Demokratike, në bunkerin e tij privat. Me këtë rast, i kujtojmë Lulzim Bravës që mendon se me dyer dhe brava do të mposhtë shumicën dhe pluralizmin në Shqipëri se ata që shembën regjimin me gjakatar në ’90 nuk do të lejojnë kurrë asnjë derë brave, hekur apo shul të mbajë peng vullnetin e tyre të shprehur përmes votës së lirë. Partia Demokratike ka lindur si shtëpi e lirisë dhe e tillë do të vijojë të mbetet, kurse Lulzim Pengu së bashku me pengmarrësin e tij do kenë fatin e atyre që bunkerizuan Shqipërinë”, thuhej në reagimin e Komisionit të Rithemelimit të Pd-së.
KUNDËRPËRGJIGJJA
Zyrtarisht reagoi edhe Partia Demokratike. Përmes një njoftimi të shpërndarë nga zyra e shtypit, Pd-ja zyrtare akuzon ish-kryeministrin Berisha se po përgatit sulm me ndihmën e trafikantëve kundër Partisë Demokratike. Sipas njoftimit të Pd-së, këtë akt Berisha do ta ndërmarrë për interesat personale. Ndërkohë, në vijim të kundërpërgjigjes, Pd-ja sqaron se në godinën e partisë po bëhen rregullime. “Partia Demokratike nuk do të jetë kurrë e hapur për trafikantët e drogës që shoqërojnë Sali Berishën në sulmin që po përgatit kundër Partisë Demokratike për të vendosur hallin e tij mbi të ardhmen e gjithë demokratëve. Çdokush e ka të qartë se gjuha dhe aktet e tij kanë qëllim të nxisin dhunë, si opsionin e vetëm që i ka mbetur. Sali Berisha mund të shoqërohet me trafikant droge të shpallur ‘non grata’ në Mbretërinë e Bashkuar, pjesë e organizatës kriminale B9. Mund t’i ftojë në shtëpi, familjarët e tij mund të bëjnë edhe biznes me pasuri të paluajtshme me ta në një skemë të pastër pastrimi parash, si dhe mund të ndajnë edhe fitimet nga bizneset me lojërat e fatit, por kurrë nuk kanë për t’u lejuar më të bëjnë biznes me sakrificën e demokratëve. Kurrë më! Shumica dërrmuese e anëtarëve të Kryesisë së Partisë, Këshillit Kombëtar dhe 5004 delegatë të Kuvendit Kombëtar, më 18 dhjetor zgjodhën të ardhmen, zgjodhën t’i shërbejnë interesit të demokratëve, zgjodhën t’i shërbejnë vetëm interesit të Shqipërisë. Kasafortizimi dhe bunkerizimi nuk janë metoda të Partisë Demokratike, por të celulave ilegale që të vetmin merak kanë karriget dhe zyrat e tyre. Punimet dhe mirëmbajtja në seli këtë fillimviti bëhen në funksion të riorganizimit dhe rifreskimit të strukturave qendrore të partisë. Selia qendrore e Partisë Demokratike ka qenë dhe do të jetë gjithmonë e hapur për demokratët e sakrificave dhe kontributeve, por e mbyllur për ata që e kanë mbajtur peng Partinë Demokratike gjatë gjithë këtyre viteve me shpresën se mund ta përdorin për t’u fshehur, mbrojtur apo rregulluar punët e tyre të pista”, thuhet në reagimin e Pd-së.
AKUZAT
Por përmes një tjetër reagimi, Komisioni i Rithemelimit akuzoi Bashën se në 8 vitet e shkuara shkelte mbi sakrificën e demokratëve për interesat e tij personale. Ata sjellin në vëmendje dosjen e lobimit, dosjen e “Toyota Yaris” dhe projektin në Portin e Durrësit. “Në 8 vjet, ndërkohë që Lulzim Brava shkelte mbi sakrificat e demokratëve për pazare me Ramën, shqiptarët nuk kanë dëgjuar apo parë askënd të luftojë dhe denoncojë narkoshtetin, narkotrafikantët dhe krimin e organizuar më shumë se Sali Berisha! Akoma më qesharake vjen akuza për pastrim parash kur në fakt, i vetmi politikan i akuzuar zyrtarisht për pastrim parash është vetë Lulzim Brava për pagesa deri në 800 mijë dollarë! Është kjo dosje bashkë me ‘Toyota Yaris’ të cilat e kanë lënë peng të Edi Ramës! Është afera e Portit të Durrësit pazar-karremi që e bën ti. Sa për takimin e shoqatës Basha-bardhi, nuk ka gaztor që mund të shpjegojë se si në një sallë me 1950 karrige qenkan ulur 5004 delegatë! Në fakt kjo është dhe një nga arsyet përse shqiptarët nuk kanë asnjë besim që votën e tyre të lirë mund ta garantojë dikush që gënjen dhe manipulon me zë dhe figurë votën e demokratëve!
Por në pak ditë, Shqipëria dhe Partia Demokratike do të ndahen nga opozita e dështuar e korruptuar dhe e kapur e Lulzim Bravës! Nuk ka bunker, bravë apo shul që do mund të pengojë vullnetin e demokratëve për ta çliruar opozitën nga pazaret dhe pengjet”, reagoi Komisioni i Rithemelimit të Pd-së.
Me këtë rast, i kujtojmë Lulzim Bravës që mendon se me dyer dhe brava do të mposhtë shumicën dhe pluralizmin në Shqipëria, se ata që shembën regjimin me gjakatar në ’90 nuk do të lejojnë kurrë asnjë derë brave, hekur apo shul të mbajë peng vullnetin e tyre të shprehur përmes votës së lirë
Partia Demokratike nuk do të jetë kurrë e hapur për trafikantët e drogës që shoqërojnë Sali Berishën në sulmin që po përgatit kundër Partisë Demokratike për të vendosur hallin e tij mbi të ardhmen e gjithë demokratëve. Çdokush e ka të qartë se gjuha dhe aktet e tij kanë qëllim të nxisin dhunë, si opsionin e vetëm që i ka mbetur.