Nedim Bajrami, për fantazistin në skenë del pista Sasuolo
Merkatoja në Serinë A është hapur zyrtarisht dhe ndër emrat që përfliten për një largim janë edhe ata të dy lojtarëve të Kombëtares, Nedim Bajrami, për të cilin interesohet seriozisht Sasuolo, si dhe Marash Kumbulla, që nuk po gjen hapësira dhe Fiorentina kërkon të përfitojë.
Bajrami - Nedim Bajrami është një nga lojtarët më të rëndësishëm të Empolit, i cili ka shkëlqyer me paraqitjet këtë sezon, ku me golat edhe asistet e tij i ka dhuruar pikë me vlera ekipit toskan. Sipas asaj që raporton “Sky Sport”, Alesandro Dionisi, ish-trajneri i Empolit, aktualisht me Sasuolon, po e ndjek me mjaft interes trekuartistin e Kombëtares shqiptare për ta afruar në merkaton e janarit. Gjithsesi, ekipi toskan nuk dëshiron të privohet nga 22-vjeçari shqiptar, i cili konsiderohet një nga lojtarët e rëndësishëm të skuadrës. Bajrami në këtë sezon me Empolin është aktivizuar në total në 17 ndeshje, duke realizuar 4 gola dhe ka dhuruar edhe 3 asiste.
Kumbulla - Marash Kumbulla u ka bërë të ditur drejtuesve të Romës pak ditë më parë se nuk dëshiron të lëvizë në merkaton e janarit, pasi do të synojë të fitojë hapësira me Zhoze Murinjon. Por kjo nuk ka zbehur aspak interesimin e klubeve të tjera italiane për futbollistin. Gjatë ditëve të kaluara kanë dalë në skenë shumë emra skuadrash që janë të gatshme të presin krahëhapur mbrojtësin. Por në majë të listës është pa dyshim Fiorentina, e cila raportohet se po mendon seriozisht që të bëjë një ofertë për lojtarin dhe klubin e Romës. Mediat e qytetit të Firences bëjnë të ditur se drejtuesit e klubit në fjalë kanë ndjekur me interes Kumbullën që në vitet e tij te Verona dhe kishin tentuar ta afronin dy vite më parë, kur ai zgjodhi ofertën e verdhekuqve. Tani do të bëhet një përpjekje tjetër, ndoshta e përqendruar më shumë për verën, pasi e shohin lojtarin si një investim afatgjatë për të ardhmen, ku Fiorentina kërkon që të bëhet faktor në futbollin italian dhe të synojë kualifikimin në Ligën e Kampioneve.