Zbardhet skema, si u nxor dhe u shpërnda databaza e pagave nga sistemi i Tatimeve
U shitën për 20 mijë lekë, Policia e Tiranës arreston katër persona, dy prej të cilëve specialistë të It-së së Tatimeve
Skandali i publikimit të pagave të rreth 650 mijë qytetarëve shqiptarë të punësuar në sektorin publik dhe privat, tanimë ka autorë.
Katër persona kanë përfunduar në prangat e Policisë pas hetimeve të kryera. Me urdhër të Prokurorisë së Tiranës, janë arrestuar dy punonjës të It-së së Drejtorisë së Tatimeve, përkatësisht Andi Agaraj dhe Eni Qirjako, si dhe 2 përmbarues privatë të quajtur Klodian Sota dhe Endri Ikonomi. Ndërsa specialistët kanë nxjerrë të dhënat, dy të fundit dyshohet se i kanë blerë ato për t’i përdorur për mbledhjen e kredive të këqija të qytetarëve. Dyshohet se Ikonomi, pronari i “PRO 3VT” sh.p.k, institucion financiar mikrokredie dhe Klodian Sota, pronar i “SMART COLLECTION” sh.p.k., kompani që merret me mbledhjesh detyrimesh dhe kredi të këqija të bankave të nivelit të dytë, e kanë përdorur listën e pagave për të gjetur personat me kredi problematike. Prokuroria ka vënë nën hetim në gjendje të lirë edhe drejtorin e It-së pranë Drejtorisë së Përgjithshme të Tatimeve, Ervin Muça.
SKEMA
Nga hetimet e Prokurorisë së Tiranës ka rezultuar se specialistja e It-së te Tatimet, Eni Qirjako, ka marrë të dhënat e pagave në sistem dhe ia ka dërguar kolegut të saj të It-së, Andi Agaraj. Ende nuk dihet se pse është përdorur kjo skemë, pasi të dy specialistët kanë akses në të dhënat e pagave të shqiptarëve. Ka qenë Agaraj ai që i ka shitur këto të dhëna me një vlerë prej rreth 20-30 mijë lekë për çdo databezë te përmbaruesit privatë. Këta të fundit dyshohet se i shpërndanë më pas ato në rrjetin e komunikimeve elektronike “Whatsapp”. Në dosjen e Prokurorisë thuhet se specialistja Qirjako ka filluar punë pranë Drejtorisë së Përgjithshme të Tatimeve më 20 korrik të vitit 2020. Ndërsa ajo kishte nisur t’i kalonte pagat kolegut të saj, më shumë se një vit më vonë Qirjako ka kuptuar se pagat po shpërndaheshin jashtë institucionit, duke njoftuar drejtorin Ervin Muça për çfarë po ndodhte. Ajo ka sqaruar në email-in dërguar drejtorit se krijimi i dosjes “Exel” përkonte me datën dhe orën që ajo ia kishte dërguar këto të dhëna specialistit tjetër të It-së, Andi Agaraj. Gjithashtu, Qirjaku ka përdorur userin me emrin Moza Seraj, nga i cili kanë dalë të dhënat. “Është zbuluar se këto të dhëna kanë dalë nga x person, IT pranë Drejtorisë së Tatimeve. Më pas është bërë ndjekja zinxhir e qarkullimit të të dhënave dhe është zbuluar se këto të dhëna u janë shitur subjekteve të tjera. Prokuroria po heton jo vetëm mekanizmin e ngjarjes, por edhe në drejtim të qëllimit të shpërndarjes së tyre. Për aq kohë sa ne kemi një konkluzion të qëllimit të përdorimit të tyre, nuk mund të themi që kemi këtë apo atë hipotezë. Do ta quaja një vepër penale që cenon të drejtat e qytetarëve”, tha Imeraj.
HETIMET PËR TARGAT
Në të njëjtën kohë, Prokuroria është duke zhvilluar hetime edhe për publikimin e listës së targave për dhjetëra-mijëra automjeteve private, shtetërore, biznese, banka etj. Janë rreth 530,452 targa të automjeteve të qytetarëve shqiptarë dhe targat e 61,513 bizneseve që u publikuan pak ditë pas publikimit të listave të pagave. “Po hetohet edhe Drejtoria e Transportit Rrugor pasi kanë dalë të dhëna që lidhen me targat. Një veprimtari e tillë ka disa kohë që zhvillohet, siç është çështja e patronazhistëve”, tha Ymeraj.