Çfarë thotë shënjestra e atentatit në Vlorë, makina u vodh në Tiranë
Shënjestra e një atentati në qytetin e Vlorës, Diego Hanaj, i cili arriti të shpëtonte vetëm me një plagë në dorë, pavarësisht se ndaj tij u qëllua me breshëri kallashnikovi, kishte pak ditë që ishte kthyer në vendlindje me rastin e festës së ndërrimit të viteve. Burimet bënë me dije se Hanaj sapo ishte kthyer nga Holanda. Ende nuk dihet nëse ai është përfshirë në ndonjë aktivitet të jashtëligjshëm në këtë vend. Vetë Hanaj, në dëshminë e tij, nuk e ka ndihmuar grupin hetimor për të zbardhur ngjarjen. Ai ka deklaruar se nuk ka konflikte me asnjë person dhe se nuk i kishte njohur atentatorët. Ndërkohë, kamerat e sigurisë të sekuestruara nga Policia kanë filmuar automjetin me të cilin autorët shkuan në vendin e ngjarjes dhe më pas qëlluan në drejtim të 36-vjeçarit. Automjeti kishte qarkulluar edhe herë të tjera në këtë lagje, ndoshta për të vëzhguar lëvizjet e Hanajt. Madje atentatorët nuk i kanë ndaluar as thirrjes së patrullës së Policisë menjëherë pas atentatit ndërsa largoheshin me shpejtësi nga vendi i ngjarjes. Makina u gjet e djegur një ditë më vonë në fshatin Trevllazën. Sipas burimeve, automjeti tip “Audi” rezulton me targa të vjedhura në Tiranë. Gjithashtu, automjeti rezulton pa numër shasie, e cila dyshohet të jetë vjedhur gjithashtu. Mbrëmjen e së mërkurës, Diego Hanaj ishte në një nga lokalet pranë pallatit ku jeton, duke konsumuar kafe. Pasi ka dalë prej andej, 36-vjeçari është nisur për në banesën e tij në të njëjtin pallat. Teksa Hanaj kishte shkuar pranë hyrjes së ndërtesës, ndaj tij është organizuar atentati, duke e qëlluar me armë zjarri nga një automjet në lëvizje. Nga të shtënat, 36-vjeçari ka marrë një plumb në dorë, duke lëvizur përreth 50 metra, ndërkohë që autorët po e ndiqnin me synim për ta vrarë. Ndaj tij është qëlluar me armë automatike, por fatmirësisht nuk e ka kapur asnjë plumb tjetër. Burimet bënë me dije se 36-vjeçari i ka pikasur autorët që po e ndiqnin dhe është përpjekur të largohet.