RENEA kontrolle blic në të gjithë vendin, 19 të arrestuar
Operacioni pas atentateve, në pranga edhe trafikantë droge
Pas atentateve të njëpasnjëshme në disa qytete të vendit si në Shkodër, Tiranë dhe Vlorë, forcat RENEA kanë zbarkuar në një sërës qarqesh për të kryer kontrolle dhe për të arrestuar persona problematikë. Kontrollet e befasishme janë zhvilluar në Tiranë, Durrës, Lezhë, Shkodër, Vlorë e Gjirokastër, në përfundim të të cilave janë arrestuar apo shoqëruar 19 persona. Midis të arrestuarve rezultojnë edhe shtetas në kërkim ndërkombëtar për trafik droge. Kështu, në Nikël u arrestuan në flagrancë shtetasit Zenel Haka, 22vjeç,
Gazmir Haka 23 vjeç dhe Mareklen Haka, 31-vjeç, pasi gjatë kontrollit në një lokal, shërbimet e Policisë gjetën dhe sekuestruan një armë zjarri pistoletë, municion luftarak dhe një sasi lënde narkotike kokainë e
ndarë në doza gati për shitje.
Në Tiranë u arrestuan në flagrancë shtatë persona, kryesisht për organizimin e lojërave të fatit dhe përshtatjen e ambienteve të lokaleve për konsumim të lëndëve narkotike. Në
Lezhë, 6 persona u arrestuan për vepra të ndryshme penale. Në qytetin e Vlorës, u arrestua në flagrancë shtetasi Gentjano Mehmeti, 31 vjeç, pasi në ambientet e lokalit të tij, iu gjet një armë zjarri pistoletë, municion luftarak dhe një sasi lënde narkotike kokainë. Në Gjirokastër është kapur dhe vënë në pranga një person në kërkim ndërkombëtar, konkretisht shtetasi Klement Shehu, 39 vjeç, banues në Libohovë. Gjykata e
Apelit të Romës në Itali, e ka dënuar këtë shtetas me 6 vjet burgim për kryerjen e veprës penale “Organizatë kriminale me qëllim trafikimin e drogës”. Ndaj, 39-vjeçarit i kanë mbetur për të vuajtur 4 vjet e 21 ditë burgim.