Mbledhja e Kryesisë deri në orët e para të mëngjesit, ja ndryshimet në PD
Nga Berisha te Noka e Vokshi, ndryshimet në Grupin Parlamentar të PD, në komisionet e Kuvendit dhe drejtuesit politikë në qarqe
Mbledhja për vendimmarrje mbi masat për ishkryeministrin Sali Berisha dhe deputetët që mbështesin atë ka thyer çdo rekord të mbledhjeve të Kryesisë së Pd-së.
Në mbledhjen që nisi në 18 e 30 dhe përfundoi në orët e para të mëngjesit u diskutua për vendimin për përjashtimin e deputetëve që kanë dëmtuar interesat politike të Pd-së.
MINUTË PAS MINUTE
Kryesia e Partisë Demokratike u mblodh dje në orën 18:30, pas një njoftimi të dërguar nga sekretari i përgjithshëm, Gazment Bardhi. “Te nderuar anëtarë të Kryesisë! Sot në orën 18:30, me kërkesë të Kryetarit të partisë, do të mblidhet Kryesia e partisë, me rend dite: ‘Diskutim mbi situatën e krijuar pas dhunës së paprecedent ndaj të gjithë anëtarëve të organeve të Partisë dhe selisë së Pd-së gjatë protestës së 8 janarit”, shkruhej në mesazhin që numri dy i Pd-së u çoi anëtarëve të Kryesisë dje pak mesdite. Mbledhja ishte e një rëndësie të madhe dhe erdhi menjëherë pas protestës së 8 janarit të thirrur nga ish-kryeministri Berisha dhe Komisioni i Rithemelimit. Anëtarët e Kryesisë shkuan në mbledhje siç ishte lajmëruar, ndërkohë që në fillim kreu i Pd-së kërkoi nga anëtarët e kryesisë që të mos kishte rrjedhje informacioni në lidhje me diskutimet që zhvilloheshin brenda. Për këtë ai ka kërkuar që deputetët të kishin marrëdhënie të distancuar me aparatet e tyre celulare. Ndërkohë, nisën menjëherë edhe diskutimet, duke komentuar atë që ndodhi më datë 8 janar. Strategjia e kryedemokratit Basha ishte e qartë që në mbrëmjen e djeshme ngjarjet e minutës së fundit të mos bëheshin objekt diskutimi në emisionet politike, ndaj disa prej anëtarëve të Kryesisë shkuan në debate politike, ndërsa një pjesë më e madhe e anëtarëve të kryesisë qëndroi në selinë e Pd-së dhe larg telefonave. Anëtarët e parë që u larguan ishin rreth orës 20 e 30, ndërsa i fundit që u rikthye ishte rreth orës 24:00. Pasi u plotësua Kryesia, nisën edhe një herë diskutimet në parim për të vijuar mbledhjen deri në orën 1 e 30 pas mesnate.
PROGRAMI ORGANIZATIV
Por këto nuk janë ndryshimet e vetme në selinë blu. Në Kuvendin e 18 dhjetorit të vitit që kaluam, që u thirr nga Kryesia dhe kryedemokrati Basha, u miratua programi organizativ deri në marsin e këtij viti. Në fakt ishte parashikuar që të ndodhte deri në fund të vitit që kaloi, por afati i miratuar në 18 dhjetor u shkel. Bëhej fjalë për emërimin e drejtuesve të rinj politikë dhe ndryshimet në komisionet parlamentare. Kujtojmë që në grupin e deputetëve që janë pozicionuar në krah të ishkryeministrit Berisha ka nga ata të cilët para 25 prillit u caktuan drejtues politikë dhe që pas zgjedhjeve u vendosën në poste konkrete në komisionet parlamentare. Kështu, Tritan Shehu në Gjirokastër, Bujar Leskaj në Vlorë, Edi Paloka në Durrës, dhe Agron Shehaj, Albana Vokshi, Belind Këlliçi, Edmond Spaho dhe Flamur Noka në Tiranë kanë mbajtur postin e drejtuesit politik, por që tashmë, pas situatës së re politike, pritet që të ndërrohen. Po kështu, ndryshime do të ketë edhe në komisionet parlamentare. Kujtojmë që Albana Vokshi në shtator u caktua nga Grupi Parlamentar i Pd-së si kryetare e Komisionit të Shëndetësisë, por që tashmë pritet të ndërrohet. Edhe deputetja e re në Parlament Sorina Koti gjithashtu pritet që të mos jetë më nënkryetare e Komisionit të Ekonomisë pasi është pozicionuar në krah të ish-kryeministrit Sali Berisha.