“Bashës i ka ardhur fundi”, anëtari i FRPD: Te zyra është era e gazit
Një grup anëtarësh të Forumit Rinor të Partisë Demokratike, mbështetës të ish-kryeministrit Berisha, kanë deklaruar se te zyra e tyre në seli është akoma prezente era e gazit lotsjellës. Në deklaratën për mediat, pas një vizite në selinë e Pd-së, dy ditë pas protestës së dhunshme të 8 janarit, shprehen se nuk mund të punojnë dot në atë zyrë. Ata shprehen se ndodhen në selinë e Partisë Demokratike për një mbledhje pune, por që nuk mund të aksesojnë dot në zyrat ku kanë ushtruar aktivitetin e tyre më përpara. Njëri prej tyre shprehet për kamerat se në zyrat e forumit ende ndihet era e gazit lotsjellës. Ai thekson se shumë prej të rinjve janë burgosur nga qeveria në përpjekje për të bërë zotin Basha Kryeministër dhe tashmë ata duhet të shkojnë përsëri në komisariate si të kallëzuar prej tij. “Më në fund, pas 8 vjetëve, peng-basha arriti t’i ngjajë shefit të tij, Edi Ramës. Arriti ta kthejë Pd-në, nga një shtëpi të lirisë, në një çerdhe të krimit, të mercenarëve të paguar kundër demokratëve dhe kundër të rinjve. Ne shkuam në zyrat e forumit, por akoma është era e gazit lotsjellës. Unë dua t’i bëj vetëm një pyetje: nga kush ka frikë, pse ka frikë nga të rinjtë? Shumë prej nesh kanë qenë në burgje këto 8 vjet për ta bërë këtë zotërinë Kryeministër, ndërkohë që ky nuk ka dashur. Ky zotëria ka çuar emrat e shumë të rejave dhe të rinjve të Forumit Rinor nëpër komisariate, pa dhunuar askënd, ne jemi dhunuar. I bëj thirrje të tërhiqet dhe të ikë, se ai nuk e bën dot kryetarin dhe ka ardhur fundi për të”, tha për mediat një prej anëtarëve të Forumit Rinor.