Harta e re gjyqësore, avokatët e Lezhës: Bojkot seancave!
Dhoma e Avokatisë paralajmëron protestë: Nuk mund të bëhet drejtësi duke demotivuar qytetarët që të shkojnë në gjykata
Avokatët e Lezhës paralajmërojnë bojkot të punës, nëse nuk do merren në konsideratë propozimet e tyre në lidhje me hartën e re gjyqësore.
Dhoma e Avokatisë zhvilloi një takim në lidhje me këtë çështje dhe propozimet konkrete te tyre do t’i dërgohen Dhomës Kombëtare të Avokatisë, Ministrisë së Drejtësisë dhe Këshillit të Lartë Gjyqësor. Kryetari i Dhomës së Avokatisë në Lezhë, Elton Laska thotë se kemi disa pika konkrete ku kundërshtohet harta e propozuar. “Ne si dhomës avokatie zhvilluam një takim në lidhje me hartën e re Gjyqësore. Kemi disa pika ku e kundërshtojmë këtë hartë të re gjyqësore, këto do ia referojmë KLGJ-NË, Dhomës Kombëtare të Avokatisë dhe Ministrisë së Drejtësisë”, thuhet në reagim.
SHKRIRJA E GJYKATAVE
KLGJ-JA dhe Ministria e Drejtësisë kanë propozuar uljen e numrit të gjykatave në kuadër të reformimit të sistemit të drejtësisë. Por nuk ka analizuar mungesën e ambienteve mund ta arrijnë vetëm të pasurit. Ulja e numrit të gjykatave, indirekt stimulon shpopullimin e zonave periferike të vendit pasi ul shërbimet. Shkrirja e gjykatave vret profesionin e avokatit në këto zona duke detyruar këtë kategori të zhvendoset me banim në zonat ku përqendrohen gjykatat. Kjo varfëron intelektualisht zonat në fjalë. Mjafton të shikoni Gjykatat Administrative për të kuptuar se ulja e numrit të tyre është dështim që në nisje. Ishin 6 shkallë të para dhe 1 apel për gjithë vendin. Në shkallë të parë gjyqi mbaronte nga 3 muaj deri në 1 vit, Apeli vonon 4 vite e sipër”, thuhet në deklaratën e avokatëve të Lezhës. “S’KA DREJTËSI DUKE DEMOTIVUAR QYTETARËT”
Ata thonë se janë dakord me përqendrimin e gjykatave të Apelit, por jo të shkallës së parë, për vetë faktin se proceset gjyqësore zgjaten me vite të tëra. “Nuk bëhet drejtësi duke demotivuar qytetarët t’i drejtohen Gjykatës, por duke dhënë drejtësi për gjyqet që qytetarët vendosin të hapin. Na kushton më pak të rrisim numrin e gjyqtarëve dhe gjykatave të apelit sesa e kundërta”, thotë Elton Laska, kryetari i Dhomës
Avokatisë Lezhë. Ndërsa sekretari i Dhomës se Avokatisë Erjon Gjoni kërcënon me bojkot të proceseve gjyqësore nëse propozimet e tyre nuk do të merren në konsideratë. “Propozimet kanë të bëjnë edhe me mundësinë e bojkotimit të seancave gjyqësorë, përfshirë ato për vleftësimin e arrestit dhe caktimin e masës së sigurimit si kusht për të na marrë në konsideratë për mos ndryshimin e hartës së re gjyqësore pa u konsultuar mirë”, thotë Gjoni. Dhoma e Avokatisë Lezhë është totalisht kundër hartës së re gjyqësore të propozuar aktualisht, pasi sipas avokatëve diçka e tillë cenon aksesin e qytetarëve në sistemin e drejtësisë dhe rrit kostot financiare për ta. “Cenon aksesin në sistemin gjyqësor por në të njëjtën kohë pamundëson zhvillimin në kohë të seancave gjyqësore. Gjithashtu rrit koston financiare për qytetaret, ndaj dhe ne jemi totalisht kundër kësaj harte, e cila nuk është konsultuar fare me ne, sikur të mos ishim pjese e një çështje të tillë”, shton Erjon Gjoni, sekretar i Dhomës së Avokatisë në Lezhë. Referuar hartës së re gjyqësore në qarkun e Lezhës është parashikuar të ketë vetëm një gjykatë, ndërsa ajo e Kurbinit do të shkrihet.