Tërmeti i fortë në Greqi shkakton dëme në Devoll

Banorët e fshatrave: Lëkundjet e forta dëmtuan muret e banesave

Korçë- Tërmeti i fuqishëm me magnitudë 5.3 ballë të shkallës Rihter që goditi Follorinën në Greqi dy net më parë, ka shkaktuar dëmtime të banesave edhe në Bashkinë e Devollit. Burime bëjnë me dije se aktualisht janë bërë 17 kërkesa për dëmtime të banesave në disa fshatra. Institucioni i perfektit në bashkëpunim me bashkinë po bën verifikimin e kërkesave të bëra. Bëhet me dije se ashtu sikurse në bashkinë Devoll edhe në Bashkinë Pustec po vijon puna për verifikimin e dëmeve nga tërmeti. Kujtojmë se sipas komunikimit me kryetarin e Bashkisë Devoll, Eduart Duro, grupet e emergjencave civile kanë nisur verifikimin në terren për rastet e raportuara. Paraprakisht thuhet se banesat, për të cilat raportohet se janë dëmtuar janë banesa të vjetra dhe të amortizuara, të cilat kanë pasur probleme edhe më parë. Megjithatë, në fund të verifikimeve do të vendoset nëse kemi të bëjmë me dëmtime serioze nga tërmeti, nëse banesat janë të banueshme ose jo, e më pas do të merren masa për ndërhyrje.

BANORËT: U ÇANË MURET E SHTËPIVE

Banorët thanë se lëkundjet e tërmetit u kanë çarë muret e shtëpive, duke kërkuar ndihmë nga institucionet shtetërore. “U trondit shumë. Mora fëmijët dhe dolëm jashtë. Tavanet dhe muret janë çarë. I ka dëmtuar suvatë. E shikoni vetë se si janë bërë. Sot u ankuam te komuna. Edhe djalit poshtë i kanë rënë tavanet”, tha një e moshuar. Një i ri deklaroi se tërmeti i kishte dëmtuar shtëpinë dhe se nuk kishte ku të jetonte. “Tërmeti ishte i fuqishëm. Shkaktoi dëme. Çau muret. Kjo vjen edhe si pasojë e tërmetit të vjetshëm. Ne kemi bërë ankesë në qendrën administrative në Progër te kryetari. Nuk ka ardhur asnjë njeri deri më tani. Sot (dje) e bëmë ankesën. Kërkuam ndihmë nga emergjencat. Nuk kemi ku të jetojmë. Këto janë kushtet. Mora fëmijët, nënën dhe babën dhe dola jashtë. Ishte i fuqishëm dhe zgjati”, u shpreh ai. dh.ç