Anketimi, 42% e bizneseve gjermane notë negative për situatën ekonomike
Rezultatet e anketimit vjetor të DIHA për klimën e biznesit dhe të investimeve Çmimet e energjisë dhe të lëndëve të para janë rreziku më i madh për biznesin. Vështirësi po shkakton edhe emigracioni i fuqisë punëtore
Edhe pse në përqindje më të ulët në raport me një vit më parë, pjesa më e madhe e bizneseve gjermane vlerësojnë me notë negative situatën ekonomike në vend.
Në anketimin vjetor të zhvilluar nga Shoqata Gjermane e Industrisë dhe Tregtisë në Shqipëri (DIHA) për klimën e biznesit dhe investimeve në Shqipëri, 42 për qind e kompanive e kanë cilësuar situatën të keqe, 18 për qind të mirë dhe 39 për qind të kënaqshme. Por si ka ndryshuar ky perceptim në raport me një vit më parë? Pandemia vuri jo pak në vështirësi biznesin. Kjo bëri që të tkurrej në 8 për qind përqindja e bizneseve që e vlerësonin pozitivisht situatën. Nga ana tjetër ishin më shumë se 60 për qind e tyre që e konsideronin situatën gri.
ANKETIMI
Sa u takon pritshmërive, rezultatet tregojnë se 21 për qind e të anketuarve vlerësojnë pritshmëritë për situatën ekonomike më mirë, ndërkohë që vitin e kaluar këtë vlerësim e kishin 23 për qind e bizneseve. Pjesa dërrmuese, 44 për qind e kompanive,vlerësojnë si të pandryshuar pritshmëritë për situatën ekonomike, ndërsa 36 për qind e tyre e vlerësojnë negativisht. Megjithëse ka një frymë më optimiste, kur vjen puna te bilanci apo te te ardhurat e biznesit, sërish ka rezerva. Konkretisht, 36 për qind e të anketuarve vlerësojnë situatën për vetë biznesin më mirë, ndërkohë që vitin e kaluar këtë vlerësim e kishin vetëm 25 për qind e tyre. Ndërkohë, 46 për qind e kompanive vlerësojnë si të pandryshuar situatën e tyre dhe 18 për qind e vlerësojnë negativisht. Ndër faktorët të cilët ndikojnë në zgjedhjen e një destinacioni investimesh, janë vlerësuar më mirë produktiviteti dhe motivimi i punonjësve, kualifikimi i punonjësve dhe kostoja e punës. Një ndryshim pozitiv dallohet edhe te faktorët që më parë shiheshin në mënyrë shumë kritike, si barra tatimore, sistemi dhe administrata tatimore, stabiliteti politik dhe social dhe siguria ligjore. Duke u nisur edhe nga zhvillimet e fundit, pjesa më e madhe e bizneseve të anketuara konsiderojnë “kërcënim” çmimet e energjisë dhe të lëndëve të para. Veç kësaj, ndër risqet kryesore përmenden edhe mungesa e forcës së punës dhe kostoja e punës. Pyetjes “Si e shihni zhvillimin e tregut të punës në Shqipëri?, 73 për qind e të anketuarve i janë përgjigjur se intensiteti i emigrimit do të rritet. Vetëm 18 për qind vlerësojnë se volumi aktual i emigrimit do të ulet në një të ardhme të afërt. Me sa duket, shkalla e lartë e emigrimit po e bën gjithnjë e më të vështirë gjetjen e forcave të punës, aq më pak me kosto të ulëta. Presidentja e DIHA-S, Stephanie Sieg-farka, u shpreh në fjalën e saj përshëndetëse se pandemia ka shkaktuar humbje të mëdha për disa kompani dhe disa prej tyre madje u është dashur të mbyllin veprimtarinë e tyre. Është e kuptueshme që ekonomia nuk mund të rimëkëmbet menjëherë, veçanërisht pas sfidave dhe vështirësive të reja që i sjell ekonomisë lufta në Ukrainë. Megjithatë, ajo theksoi se perspektivat e biznesit për të ardhmen janë përmirësuar nga viti i kaluar, por emigracioni i fuqisë punëtore po shkakton vështirësi.
AMBASADORI GJERMAN
Ambasadori Gjerman, Peter Zingraf, ndërsa siguroi bizneset për mbështetje, vuri në dukje se lufta ndaj korrupsionit, shteti i së drejtës dhe transparenca mbeten qendrore nëse ne duam të shfrytëzojmë tërësisht potencialin e marrëdhënieve ekonomike gjermano-shqiptare. “Lufta në Ukrainë ka tronditur të gjithë botën dhe efektet e saj janë ndjerë pothuajse kudo. Rritja e kostove, veçanërisht për energjinë,
përbën një tjetër sfidë për kompanitë. Gjermania ka ndihmuar dhe do të ndihmojë në zbutjen e ndikimit ekonomik, qoftë nëpërmjet ndihmës direkte pas tërmetit; mbështetjen e SME-VE të prekura nga pandemia përmes një strukture këshillimore dhe skemave të garancisë; ose nëpërmjet bashkëpunimit tonë me qeverinë në reformimin e sektorit të energjisë. Lufta ndaj korrupsionit, shteti i së drejtës dhe transparenca mbeten qendrore nëse ne duam të shfrytëzojmë tërësisht potencialin e marrëdhënieve ekonomike gjermano-shqiptare. Ato janë vendimtare për klimën e përgjithshme të investimeve, për zhvillimin ekonomik të vendit si dhe për procesin e integrimit evropian. Sikurse e dini, në këtë rrugëtim ju mund të besoni në mbështetjen e
plotë të Gjermanisë”, tha Zingraf.
MBI ANKETIMIN
Në anketimin e zhvilluar përgjatë muajit mars dhe prill të këtij viti, morën pjesë 983 kompani, nga të cilat 33 ishin nga Shqipëria. Kjo korrespondon me një pjesëmarrje prej 43 % të kompanive anëtare të DIHA-S. Pjesëmarrësit marrin pjesë në këtë anketim online dhe përgjigjet analizohen në mënyrë anonime. Tematika dhe gama e pyetjeve është për të gjitha vendet njësoj. Rreth Shoqatës Gjermane të Industrisë dhe Tregtisë në Shqipëri (DIHA) Shoqata Gjermane e Industrisë dhe Tregtisë në Shqipëri (DIHA) është një shoqatë e pavarur, e krijuar nga kompani të ndryshme në përputhje me legjislacionin shqiptar. DIHA përfaqëson interesat e biznesit gjerman në Shqipëri.