Problematikat e shqiptarëve, Gledis Nano vizitë në Greqi
Takimi me ambasadoren Hajdaraga për problemet në pikat e kalimit kufitar Kreu i Policisë takohet homologun grek: Të rrisim bashkëpunimin mes policive
Drejtori i Përgjithshëm i Policisë së Shtetit, Gledis Nano, ndodhet në Greqi, për një vizitë pune për t’u njohur me problematikat e shqiptarëve që jetojnë atje dhe për rritjen e bashkëpunimit me Policinë greke në luftën kundër krimit të organizuar dhe krimeve ndërkufitare. Qëllimi i vizitës është forcimi i bashkëpunimit mes Policisë shqiptare dhe Policisë greke, për koordinimin e veprimeve mes policive kufitare të të dyja vendeve, me qëllim krijimin e lehtësirave të procedurave të kalimit në kufi, në të dyja anët e kufirit, në raste fluksi. Drejtor Nano u prit në një takim miqësor nga homologu i tij, drejtori i Përgjithshëm i Policisë greke, gjeneral-lejtnant Konstantinos Skoumas. Gjatë takimit, Nano dhe Skoumas diskutuan çështje
me interes më të gjerë policor, duke theksuar nevojën për forcimin e kuadrit të përbashkët strategjik për luftën kundër krimeve të rënda, krimit të organizuar, trafikut të drogës, emigracionit të paligjshëm, si
dhe për hetimin e rasteve të vrasjeve. Gjithashtu, gjatë takimit, nga të dy drejtorët e përgjithshëm u shpreh vullneti i ndërsjellë për ngritjen e nivelit të bashkëpunimit mes dy vendeve në çështjet e sigurisë, bashkëpunimit policor, shkëmbimit të informacionit dhe realizimit të trajnimeve të përbashkëta. Drejtor Nano ka theksuar se Policia shqiptare është e mirorientuar dhe e vendosur për të bashkëpunuar me partnerët, në veçanti me vendet fqinje, për të rritur forcën parandaluese
dhe goditëse ndaj krimit të organizuar dhe krimeve ndërkufitare. Pas takimit miqësor dhe shumë të rëndësishëm me drejtorin e Përgjithshëm të Policisë greke, Nano u takua edhe me ambasadoren e Shqipërisë në Athinë, Luela Hajdaraga. Nano dhe Hajdaraga diskutuan mbi problematikat e shtetasve shqiptarë në territorin
grek, problematikat në pikat e kalimit të kufirit, lehtësimin e lëvizjes së lirë në raste fluksi dhe mbi rolin e Ambasadës në interes të forcimit të marrëdhënieve mes dy policive. Kujtojmë që drejtori i Policisë, Gledis Nano, sapo zhvilloi një vizitë në SHBA, ku u takua me drejtorin e FBI-SË, Cristopher Wray.