Kokainë në portin e Durrësit, sekuestrohen 45 kilogramë
Pakot e mbështjella me personazhet e kukullave “Gogu” Policia: Droga e ndarë në 40 pako, e ngarkuar në kontejner me mish pule nga Brazili
Një sasi prej 45 kilogramësh lëndë narkotike e llojit kokainë u sekuestruar nga Policia e Durrësit mbrëmjen e shkuar.
Një operacion antidrogë i koduar “Tranziti”, bëri të mundur zbulimin e sasisë së konsiderueshme të drogës brenda një kontejneri të ardhur nga Brazili, ndërsa autoritetet portuale, sipas burimeve, ishin sinjalizuar nga partnerët ndërkombëtarë për nisjen e ngarkesës. Për këtë arsye, gjatë mbrëmjes së shkuar u zhvilluan kontrolle të imtësishme në kontejnerin e ngarkuar me mish pule. Mësohet se ngarkesa me mish kalonte tranzit nga territori i Shqipërisë, ndërsa destinacioni përfundimtar ishte Maqedonia e Veriut. “Në vijim të goditjeve të njëpasnjëshme ndaj veprimtarisë kriminale të tentativës për trafikim të drogave të forta, si rezultat i kontrolleve të shtuara, bazuar edhe në analizën e riskut të bërë nga Taskforca permanente e përbërë nga Policia Kriminale e Drejtorisë Vendore të Policisë Durrës, Policia Kufitare e Portit të Durrësit dhe nga autoritetet doganore të Portit, e cila vepron në Portin e Durrësit, në bazë të dyshimeve të krijuara nga kjo Task-forcë dhe informacioneve që dispononte Policia Kriminale e DVP Durrës,
është ushtruar kontroll i detajuar në një kontejner të ngarkuar me mish pule, që ishte nisur tranzit nga
Brazili, për llogari të një subjekti tregtar në Maqedoninë e Veriut. Si rezultat i kontrollit të imtësishëm të ushtruar në kontejner, në brendësi të ngarkesës me mish pule, u gjetën 40 pako me lëndë të dyshuar narkotike kokainë, me peshë 45 kg e 500 gramë”, sqaroi Policia e Durrësit. Në komunikatë nuk përmendet për persona të arrestuar, ndërsa shpesh ngarkesa të tilla mbeten pa autorë. Kjo është ngarkesa e dytë e kokainës e sekuestruar nga Policia brenda disa javësh, ndërsa më 17 maj, u sekuestruan 59 kg drogë në një anije me qymyr. Kokaina u gjet në hambarin e anijes “Unistream” me flamur të Antigua Barbuda nga Ishujt Karaibe. Ajo ishte e ndarë në 53 pako, në 2 çanta dhe bëhej fjalë për 59 kg. Për sasinë e lëndës narkotike, nuk pati asnjë person të arrestuar. Zakonisht, kokaina vjen në portin e Durrësit e fshehur në kontejnerët me banane, por trafikantët, mesa duket, kanë ndryshuar metodë, duke përdorur edhe ngarkesa të tjera për të fshehur drogën. Grupi hetimor, nën drejtimin e Prokurorisë pranë Gjykatës së Rrethit Gjyqësor Durrës, vijon veprimet hetimore për dokumentimin e plotë të kësaj veprimtarie kriminale, identifikimin dhe kapjen e personave të përfshirë në të.