“Do shpreh qëndrimet e PD për zhvillimet në vend e rajon”
Berisha bën udhëtimin e parë jashtë vendit si kryetar
Në Azerbajxhan në Forumin IX të Bakusë ishte edhe ish-kryeministri Sali Berisha. Në një prononcim për mediat atje, Berisha u shpreh se forumi është një mundësi e veçantë për të paraqitur qëndrimet e Partisë Demokratike për zhvillimet në vend, rajon dhe Europë. “Ju përshëndes nga Baku ku kam ardhur i ftuar nga bordi drejtues i Forumit Global IX për të marrë pjesë në punimet e këtij Forumi, i cili këtë vit ka si axhendë: ‘Sfidat e rendit botëror’. Forumi organizohet nga Qendra Ndërkombëtare ‘Nizami Ganjavi’. Në punimet e Forumit marrin pjesë dhjetëra Presidente, kryeministra, ministra të Jashtëm dhe qindra personalitete politike nga Evropa dhe të gjithë kontinentet e tjerë. Punimet e forumit i çeli Presidenti i Azerbajxhanit, Ilham Alyiev. Ky forum është një mundësi e veçantë për t’u paraqitur
miqve të mi, personaliteteve të pranishëm, publikut dhe mediave qëndrimet e Partisë Demokratike për zhvillimet në vend, në rajon dhe në Evropë”, u shpreh Berisha. Ndërkohë, kujtojmë që ky ishte udhëtimi i parë i Berishës në një forum të tillë jashtë vendit pasi u zgjodh në krye të Partisë Demokratike nga demokratët që e mbështetën që nga shtatori i vitit të kaluar. Në Shqipëri, Berisha pasi përfundoi procesi i zgjedhjeve të strukturave drejtuese në qendër nisi takimet me grupet e interesit për të evidentuar problematikat. Fillimisht ai u takua me biznesin e vogël, i cili po përballet me kushte të vështira në kulmin e krizës së çmimeve dhe po ashtu diskutoi në lidhje me problematikat që do të sjellë nëse do miratohet në Parlament një nismë për taksimin progresiv të profesioneve të lira. Ndërsa takimi i dytë ishte me mjekët, të cilët gjatë këtyre viteve të fundit kanë njohur valën më të madhe të largimeve. Ishkryeministri u tha atyre se po përballen me një regjim, ndaj kërkohet reagimi i tyre. Paralelisht me takimet e profesionistëve, Berisha ka ndërmarrë edhe nismën për takime me strukturat. Në Elbasan para disa ditësh ai u takua me intelektualë, të cilët janë të gatshëm për të kontribuar në opozitë. Por teksa Berisha po sillet si lider i Pdsë, Grupi Parlamentar mbetet ende i përçarë dhe në pritje të vendimit të gjykatës së apelit nëse do të lërë në fuqi apo do të rrëzojë vendimin e gjyqtarit Agron Zhukrui më 25 mars, i cili njohu kuvendin e Berishës të 11 dhjetorit të vitit të kaluar dhe vendimet e tyre.