Shqipëria në rrugën drejt Be-së, Josep Borrell: Nevojë urgjente
Përfaqësuesi i Lartë, zëvendëspresidenti i Komisionit Evropian, Josep Borrell, apeloi nevojën urgjente për përparim në rrugëtimin e Shqipërisë dhe Maqedonisë së drejt Besë. Zyrtari i lartë i Brukselit zhvilloi një takim me ministren për Evropën dhe Punët e Jashtme të Shqipërisë, Olta Xhaçka, në kuadër të mbledhjes së Këshillit të Sigurimit, ku Shqipëria kryesoi debatin mbi axhendën “Gratë, paqja dhe siguria”, dhe ku morën pjesë përfaqësues të lartë të OKB, UN WOMEN, OSBE, BE etj. Në një postim në rrjetet sociale, Borrell thekson se me Shqipërinë si anëtare jo të përhershme që mban Presidencën aktuale, kemi një anëtar më shumë në Këshill. Zëvendëspresidenti i Komisionit Evropian dhe kryediplomatja Xhaçka diskutuan edhe për çështjen e hapjes së negociatave të Shqipërisë me Bashkimin Evropian. “Bisedova me ministren për Evropën dhe Punët e Jashtme të Shqipërisë, Olta Xhaçka, përpara
fjalës sime në Këshillin e Sigurimit të OKB-SË, sot pasdite. Me Shqipërinë si anëtare jo të përhershme që mban Presidencën aktuale, kemi një anëtar më shumë në Këshill. Diskutuam gjithashtu për nevojën urgjente për përparim në rrugëtimin e Shqipërisë dhe Maqedonisë së drejt Be-së”, shprehet Josep Borrell, përfaqësues i Lartë, zëvendëspresident i Komisionit Evropian. Edhe Presidenti i Këshillit Europian, Chales Michel, në Forumin e Prespës në Ohër njoftoi se javën e ardhshme priten zhvillime pozitive, sa i përket hapjes së negociatave të anëtarësimit të Bashkimit Europian me Tiranën dhe Shkupin. “Çelja e negociatave të anëtarësimit me Shqipërinë dhe Maqedoninë e Veriut sa më shpejt të jetë e mundur është prioritet i lartë. Mbështesim të gjitha përpjekjet për zgjidhje të pranueshme për të dyja palët për çështjet e hapura bilaterale me Bullgarinë. Jam i angazhuar personalisht me kolegë të tjerë dhe miq në BE për ta çuar përpara këtë proces. Sinqerisht, shpresoj dhe jam i bindur se ne do të kemi zhvillime pozitive shumë shpejt”, tha Michel.