Dalja e dëshmisë së vrasësve të penduar, SPAK kërcënon me burg gazetarët
Si nisi rrjedhja e dëshmive horror të dy bashkëpunëtorëve të drejtësisë SPAK sqaron urdhrin, reagon Sali Berisha: Rama e qeveritarët e tij kanë qindra orë telefonata me Dumanët
Dje, Prokuroria e Posaçme nxori një urdhër me të cilin kërcënon me burg gazetarët për nxjerrjen e dëshmisë së dy vrasësve me pagesë, që kjo prokurori herë thotë që janë të penduar e herë jo! Rrjedhja e të dhënave tronditëse nga rrëfimet e dy vrasësve, të cilët kanë pranuar të bashkëpunojnë me drejtësinë, ndodhi menjëherë pasi shefi i SPAK-UT, Arben Kraja dhe kryepolici i vendit, Gledis Nano, e thirrën median për t’u komunikuar operacionin e suksesshëm të arrestimit të disa personave që pretendohej se ishin dhe janë pjesë e “skuadrave të vdekjes”. Po ashtu, si supersukses u shit edhe identifikimi dhe shpallja në kërkim e disa personave të tjerë, me rekorde kriminale të mëdha! Dalja e të gjithë materialit hetimor që gjendej në dokumentimin e lëshimit të 32 urdhërarresteve tronditi jo pak vendin. Në të dhe prej këtij materiali voluminoz dolën fakte komprometuese që lanë të dyshohej se operacioni i SPAK, në mos i dekonspiruar, ishte i vonuar! Pas daljes së dëshmive të Nuredin Dumanit, “kumbarit” të 8 grupeve kriminale - i cili fliste për porositës, sigurues mjetesh për vrasjen, pagesa marramendëse dhe për
mënyra se si kryheshin krimet monstruoze të tyre kudo dhe kurdo - zgjoi kureshtjen për të mësuar rrëfimin e bashkëpunëtorit më të afërt të tij, ekzekutorit Henrik Hoxha. Edhe rrëfimi i tij doli thuajse i plotë. SPAK heshti! Policia urdhëronte RENEA-N njëherë në dy ditë të shkonte në Elbasan dhe Lezhë për të arrestuar disa
koka krimi, por që dështonin në çdo sipërmarrje. Talo Çela, Suel Çela, Ervis Martinaj dhe Festim Qoli, bashkë me 10 persona të tjerë, vijojnë arratinë, ndërkohë që SPAK hyri në operacion pas më shumë se sa një muaj nga dokumentimi i dëshmive të dy killerave me pagesë! Dje urdhri u dha dorazi dhe SPAK doli me një tjetër sqarim orëve të
pasdites, ndërsa publikimin e urdhrit e bëri gazetari Elton Qyno. Pas publikimit të këtij urdhri dhe reagimeve të shumta të gazetarëve dhe të kryedemokratit Sali Berisha, SPAK reagoi edhe vetë duke deklaruar se urdhri nuk ishte për të gjithë gazetarët, por për ata që kishin publikuar sekrete që s’duhej të publikoheshin!
REAGIMI I BERISHËS
Pas shpërthimit të reagimeve në lidhje me daljen e urdhrit që i kërcënonte gazetarët me 2-5 vite burg për nxjerrjen e dëshmisë së të penduarve të drejtësisë, ka reaguar edhe kryetari i Pdsë, Sali Berisha. Kryedemokrati shprehet në një postim në rrjetet sociale se vendimi është antikushtetues, ndërsa akuzon Edi Ramën se “me SKAP-IN e partisë, po rikthen ligjin komunist të Agjitacionpropagandës”. Ai iu bën thirrje gazetarëve të mos dorëzohen, por të publikojnë gjithçka që posedojnë!
“Vendimi i Edi Ramës me SKAP-IN e tij për të dënuar me 5 vite burg gazetarët që publikojnë dëshmitë e Dumanit të qeverisë, është një akt antikushtetues, censure policeske dhe atentat ndaj lirisë së mediave, i ndërmarrë për të mbrojtur Edi Ramën dhe qeveritarët e tij, që kanë qindra orë telefonata me Dumanët e qeverisë. Ky vendim i pashembullt në 30 vitet e fundit, shënon rikthimin e ligjit dhe dënimit për agjitacion e propagandë të diktaturës hoxhiste.
Dënoj me forcën më të madhe këtë akt tejet të rëndë censure dhe kërkoj largimin e menjëhershëm te mercenarëve të Edi Rames nga sistemi i drejtësisë. Gjithashtu, u bëj thirrje gazetarëve të mos zbatojnë akte antikushtetuese, por të qëndrojnë të pamposhtur në mbrojtje të lirisë së mediave dhe të publikojnë çdo telefonatë të Edi Ramës, Taulant Ballës, Erion Veliajt, Damian Gjiknurit dhe të çdo deputeti, qeveritari vendor, gjykatësi apo prokurori dhe çdo zyrtari tjetër me vrasësit serialë, përdhunuesit, grabitësit e bandave të partisë.
U bëj thirrje institucioneve ndërkombëtare të mbrojtjes së lirisë së mediave, të dënojnë me ashpërsinë më të madhe këtë vendim të rrezikshëm”.