Marin:“shqipërianëbe!”.rama: “Finlandën e duam në NATO”
Kryeministri: Finlanda na mbështeti kur të tjerët nxirrnin bishta Kryeministrja finlandeze: “Asnjë vonesë për hapjen e negociatave”. Rama: “Ballkani është hallkë e dobët”
Edi Rama e priti dje me ceremoni shtetërore homologen finlandeze Sanna Marin, nga e cila siguroi mbështetjen për integrimin në BE, ndërsa Kryeministri i premtoi përkrahje për anëtarësimin e Finlandës në NATO.
Pikërisht çështja e integrimit të Shqipërisë në BE dhe anëtarësimi në NATO i Finlandës dhe Suedisë u diskutuan në takimin e djeshëm mes dy kryeministrave. Rama deklaroi se dyert e NATO-S duhet të jenë të hapura për Suedinë dhe Finlandën, ndërsa nuk kurseu komentet për konferencën e parë ndërqeveritare dhe veton e Bullgarisë për Maqedoninë e Veriut, që ka bllokuar edhe procesin e integrimit të Shqipërisë në BE. “Dua edhe publikisht ta
falënderoj nga zemra këtu në Tiranë për mbështetjen e pakursyer të Finlandës për Shqipërinë në procesin e integrimit europian dhe për ndihmën që na ka dhënë pa e ditur kur ndonjë vend tjetër nxirrte bishta për arsye të politikës së brendshme, ndërsa unë thoshase si ka mundësi që Finlanda nuk i ka këto probleme me ne kur
njihet si vendi me standardet më të larta të transparencës dhe llogaridhënies”, theksoi Edi Rama. Edhe Kryeministrja e Finlandës, Sanna Marin, shprehu mbështetjen e plotë të Finlandës për integrimin e Shqipërisë në BE, ndonëse Rama tha se nuk pret asgjë nga Këshilli për çeljen e negociatave. Marin theksoi
rëndësinë e integrimit në BE jo vetëm të Shqipërisë, por të gjitha Ballkanit pasi të kenë përmbushur kriteret. “Finlanda është mbështetës afatgjatë dhe i fortë i zgjerimit të Bashkimit Europian. Duam të shohim të gjitha vendet e Ballkanit Perëndimor të anëtarësohen në BE pasi të kenë përmbushur kriteret. Përparësia jonë është të nisim negociatat për anëtarësim me Maqedoninë e Veriut dhe Shqipërinë pa asnjë vonesë. Duam të mbështesim Shqipërinë për anëtarësimin e saj në BE. Shqipëria ka një zë të fortë edhe globalisht. E vlerësojmë rolin tuaj kur bëhet fjalë për përfaqësimet ndërkombëtare”, deklaroi zj. Marin. Sa i përket aplikimit të Finlandës dhe Suedisë rreth një muaj më parë për t’u bashkuar me aleancën perëndimore të mbrojtjes në përgjigje të pushtimit rus të Ukrainës, Rama tregoi mbështetjen e plotë për to, megjithëse rrezikon nga një veto e Turqisë. Kjo e fundit i ka akuzuar për mbështetjen dhe strehimin e militantëve kurdë dhe grupeve të tjera që ajo i konsideron terroriste. “Jemi në një front kundër agresionit rus në Ukrainë dhe Finlanda ka shumë për të treguar dhe shumë për të na mësuar sepse e njeh shumë mirë agresorin dhe duke qenë një vend që ka pasur në të shkuarën mundësinë që të nxjerrë më shumë mësime nga fqinjësia me Rusinë, mendoj që ka dhe një zë shumë të respektueshëm për të kuptuar se sa e rëndësishme është rezistenca dhe lidhja që disa duan të bëjnë mes asaj që ndodhi në Ukrainë dhe asaj që mund të ndodhë nesër diku tjetër. Ballkani është një hallkë e dobët, delikatë. Për këtë arsye, eksperienca dhe fjala e Finlandës ka shumë rëndësi për të gjithë komunitetin”, deklaroi Kryeministri Rama.