Kërkohen masa shtesë dhe të posaçme për 13 të penduar
Prokuroria e Posaçme ka vënë në lëvizje Drejtorinë e Përgjithshme të Burgjeve për të shtuar masat e sigurisë dhe të ruajtjes për 13 bashkëpunëtorët e drejtësisë që ndodhen të arrestuar. Ata kanë kërkuar shtimin e masave mbrojtëse për të penduarit, duke urdhëruar shtimin e efektivave dhe të vigjilencës. Ndërkaq, nuk dihet nëse urdhri bazohet në të dhëna konkrete për rrezik apo është një procedurë rutinë. Prokuroria e Posaçme i kërkon Drejtorisë së Përgjithshme të Burgjeve shtimin e masave të sigurisë për ruajtjen e jetës së bashkëpunëtorëve të drejtësisë, të cilët ndodhen të arrestuar. Burimet e prokurorisë, thonë se bëhet fjalë për 13 persona, që kanë pranuar të bashkëpunojnë në kuadër të marrëveshjeve me organet e drejtësisë për zbardhjen e ngjarjeve kriminale. SPAK i kërkon institucionit të vuajtjes së dënimeve që për të shmangur e
ndonjë incident apo kërcënim të çdo lloj forme, bashkëpunëtorët duhet të jenë ne regjime të posaçme dhe të mirëmonitoruara.
Kërkesa e Prokurorisë së Posaçme ka vënë në lëvizje institucionin ku qëndrojnë të penduarit, të cilët i kanë vendosur të gjithë bashkëpunëtorët në një regjim të posaçëm. Shkresa e SPAK për Drejtorinë e Burgjeve vjen menjëherë sapo në media janë publikuar dëshmitë e bashkëpunëtorëve të drejtësisë dhe kryesisht Nuredin Dumani dhe Henrik Hoxhës, që kanë përfshirë edhe persona të tjerë ne kryerjen e ngjarjeve kriminale në vite. Disa prej krimeve të rrëfyera nga Nuredin Dumani kanë qenë ngjarje të pazbardhura, ndërsa bazuar në dëshminë e tij, deri tani SPAK ka firmosur 32 urdhra-arresti.