Rrahim Dedja dhe kolegu i tij dëshmuan të parët për ekzekutimin e Iljaz Çalit
Rrahim Dedja dhe Ilir Çami ishin dy personat e parë të dyshuar, që kanë dëshmuar në lidhje me vrasjen e Iljaz Çalit. Të dy biznesmenë kromi, të dy në probleme konfliktuale me viktimën dhe të dy kanë rezultuar se janë përplasur me të për çështjen e minierave të kromit në Bulqizë sa ishte gjallë. Duke iu referuar të dhënave që dolën nga grupi hetimor, u bë me dije se Dedja mohoi jo vetëm përfshirjen në vrasje, por edhe shumën që ka deklaruar dy ditë më parë vëllai i viktimës, Zeqir Çali. Ai i ka thënë grupit hetimor që bëhej fjalë për një sasi rreth 350 mijë euro mall, që ende nuk ia kishte shlyer, por jo aq sa thuhej. Ndërkohë, në dëshminë që ka dhënë Ilir Çami, ky i fundit e mohoi përfshirjen në vrasje, ndonëse u tha se kishte pasur konflikte me të ndjerin prej disa kohësh. Pas vrasjes, Prokuroria kërkoi të sekuestronte praktikat e denoncimeve dhe dëshmive
respektive që janë lënë në Policinë dhe akuzën e Bulqizës. Referuar informacioneve konfidenciale, menjëherë pas asaj ngjarjeje të rëndë, u bë me dije se grupi hetimor kishte edhe pista të tjera hetimi, nga ku po gjurmohej për të shkuar te vrasësit dhe personat që kishin kërkuar ekzekutimin e biznesmenit të kromit, Iljaz Çali.
Hetimet u përqendruan edhe te biznesi që u gjendet në emrin e vëllezërve Çali, nga ku duket se çështja e ekzekutimit të të riut zgjerohej në disa rrethe të vendit. Policia bëri me dije se ka dyshime të forta se djali nga ‘Rinasi i Ri’ të jetë ekzekutuar për shkak të përplasjeve për shfrytëzimin e hapësirave të kromit, ndërsa përveç Bulqizës dhe Tiranës, hetimet u shtrinë edhe në Elbasan, Durrës dhe Fushë-krujë. Rrahim Dedja, nga Bulqiza, ka dëshmuar me detaje marrëveshjet dhe borxhin që iu kishte vëllezërve Çali. Ai nuk ka mohuar asgjë nga sa është thënë prej Zeqirit, vëllait të viktimës, përveç shifrës prej 1 milion eurove që ka pretenduar ky i fundit në Prokurori. Ai i tha grupit hetimor se kishte bërë një marrëveshje që në vitin 2016 me vëllezërit Çali për të shfrytëzuar galerinë e tyre, por që ai ka dëshmuar se një pjesë të borxhit ia kishte shlyer të ndjerit ndër vite, ndërsa i kishte borxh ende një shifër që do t’ua shlyejë vëllezërve të Iljazit në vazhdim, sapo t’i ketë.