Kalimi i pronësisë për tokat me 7501, si do të bëhet regjistrimi
Agjencia e Kadastrës ka sqaruar mënyrën e re të aplikimit përmes portalit e-albania, hapat që duhet të ndiqen
Një prej ndryshimeve më të rëndësishme të ligjit “Për përfundimin e proceseve kalimtare të pronësisë” ishte lehtësimi i procedurave për të gjithë ata që kanë ndërtuar në tokë shtet apo tokë me pronarë.
Ligji i mëparshëm parashikonte që regjistrimi i pronës të bëhej pasi të përfundonte praktika e kalimit të pronësisë në qeveri. Por me skemën e re, këtë procedurë do të duhet ta përmbyllë Drejtoria Qendrore, pa qenë nevoja që lista e përfituesve të kalojë për miratim në qeveri. Por edhe pse po bëhen gati dy vite nga zyrtarizimi i ndryshimeve ligjore, kalimet e pronësisë vijojnë të bëhen në qeveri.
REGJISTRIMI
Një ditë më parë, Agjencia e Kadastrës ka detajuar mënyrën e re të aplikimit për regjistrimin e kalimit të pronësisë, kur kjo përfitohet me anë të ligjit ose me vendim gjykate. Në tabelë janë edhe hapat që duhet të ndiqen për regjistrimin e pasurisë në emrin e tyre. Kjo duhet thënë vlen jo vetëm për ndërtimet informale të ndërtuara në tokë shtet dhe tokë me pronarë, por edhe për banesat e ndërtuara para vitit ‘91, oborret në përdorim, si edhe për tokat bujqësore të ndara me ligjin 7501. “Ky shërbim elektronik u vjen në ndihmë qytetarëve që të dërgojnë një aplikim për regjistrimin e kalimit të pronësisë në bazë të ndonjë ligji, vendim Gjykate (vendim komisioni) apo të një akti administrativ (AKKP, AMTP, Bashkia etj.). Pas dërgimit të aplikimit drejt Agjencisë Shtetërore të Kadastrës ai do të procedohet nga specialisti i ASHK-SË dhe në varësi të informacionit, kthimi i përgjigjes dhe i materialeve të kërkuara nga kërkuesi kryhet nëpërmjet informimit me e-mail, dërgimit të përgjigjes elektronike te “Dokumentet e mia” në
profilin e qytetarit në e-albania. Kërkesa për kryerjen e një shërbimi nga Agjencia Shtetërore e Kadastrës bëhet nga kërkuesi, vetë ose nëpërmjet përfaqësuesit të tij, noteri apo asistenti i noterit”, ku theksohet po ashtu se “nëse pasuria është e dixhitalizuar pas konfirmimit të kryerjes së pagesës përgjigja do ju shfaqet te ‘Dokumentet e mia’, nëse jo pas konfirmimit të pagesës dhe kryerjes së verifikimeve përgjigjja do ju shfaqet te ‘Dokumentet e mia’ brenda 13 ditëve pune”.
DOKUMENTET
Sa u takon dokumenteve
që duhet të dorëzohen nga qytetarët kërkohet: vendim i Komisionit të Kthimit dhe Kompensimit të Pronave, akt administrativ për vënie kufizimi, vendim gjyqësor i formës së prerë dhe shkresë përcjellëse nga institucioni që ka lëshuar aktin. Këto dokumente mund të dorëzohen përmes shërbimit postar në adresë të Zyrës Rajonale të Kadastrës. Ndërsa planvendosja, planirilevimi dhe shkresa përcjellëse e institucionit që kërkon regjistrimin e pasurisë sigurohen nga punonjësit e institucionit.
MIJË LEKË
është tarifa që duhet të paguhet nga qytetarët për regjistrimin e kalimit të pronësisë me anë të ligjit, me vendim të Gjykatës apo të një akti administrativ