“Tuku”, kapobanda e Niklës, çoi OFL-NË në Kushtetuese
Pasuritë e gangsterit të Fushë-krujës u konfiskuan në 2021
Gjykata Kushtetuese ka pranuar pjesërisht shqyrtimin e kërkesës së bërë nga “i forti” i Niklës, Flamur Haka, i cili kërkon shfuqizimin e vendimit të Gjykatës së Posaçme të Shkallës së Parë për Korrupsionin dhe Krimin e Organizuar, e cila në vitin 2021 vendosi të konfiskojë pronat e tij, të cilat u sekuestruan nga OFL. OFL i kërkoi në 28 shkurt të vitit 2020 Flamur Hakës që të justifikonte pasurinë, të cilën më pas e sekuestroi deri sa GJKKO vendosi që ta konfiskojë përfundimisht.
Flamur Haka është ish-i dënuar si pjesë e bandës famëkeqe të njohur si “Banda e Niklës”. Në shkurt të vitit 2008, ai është shpallur fajtor nga Gjykata e Krimeve të Rënda, e cila e ka dënuar me 16 vite burg. Por ai qëndroi në qeli vetëm 9 vjet, që nga momenti i arrestimit, pasi pjesën tjetër të dënimit e shleu me ulje të herëpashershme e më pas në liri me kusht. “Banda e Niklës” u godit gjatë një operacioni të zhvilluar në vitin 2005, ndërsa anëtarët ishin të akuzuar për 7 grabitje me dhunë, një rrëmbim personi dhe një atentat. Drejtuesi i këtij grupi ishte Flamur Haka, personi që u shoqërua dje gjatë operacionit të Policisë. Sipas përfaqësuesve të Prokurorisë që në vitin 2008 kërkonin dënimin me 91 vite burgim për anëtarët e grupit, të akuzuarit i kishin kryer veprat penale në bashkëpunim me njëri-tjetrin, por të drejtuar nga Haka. Ai ishte njëri prej drejtuesve që vendoste për objektivin dhe planin e grabitjes. Këta individë, si subjekt i ligjit special, duhet t’u përgjigjen me shkrim, brenda 48 orësh, të gjitha pyetjeve të OFL-SË. Do të jetë Gjykata e Posaçme ajo që do të vendosë për sekuestrimin ose jo të pasurive të Hakës dhe Çelës. Në vendimin e kësaj gjykate thuhet: “Gjykata Kushtetuese e Republikës së Shqipërisë, e përbërë nga: Vitore Tusha, Kryetare, Marsida Xhaferllari, Elsa Toska, Altin Binaj, Përparim Kalo, Sonila Bejtja, Sandër Beci, Fiona Papajorgji, anëtarë, me sekretare Belma Lleshi, në datën 24.05.2022 mori në shqyrtim në seancë plenare mbi bazë dokumentesh çështjen nr. 4 (F) 2021 Akti të Regjistrit Themeltar”.
Operacioni Forca e Ligjit, i cili prej afro një viti goditi pasuritë e mbi 500 subjekteve me rekorde kriminale, është në fuqi edhe pas një ankese në Gjykatën Kushtetuese, e cila nuk ka pranuar kërkesën e njërit prej subjekteve, Edlir Hysenajt, pasi sipas saj, nuk shkelen të drejtat e njeriut.
Gjykata Kushtetuese ka marrë në shqyrtim çështjen dhe ka vlerësuar se procesi gjyqësor sipas aktit normativ nr. 1/ 2020, nuk zhvillohet në fushën penale, pra nuk synon të vërtetojë një fakt penal, sepse rregullat e gjykimit në këtë rast janë ato të parashikuara në Kodin e Procedurës Civile, ndërsa pasojat e këtij gjykimi janë të natyrës civile, sepse lidhen me pasurinë. Për rrjedhojë, në rastin konkret nuk
mund të zbatohet parimi “ne bis in idem”, pra çështje e gjykuar 2 herë. Gjykata vlerëson se pretendimet për cenimin e parimit të mosdënimit dy herë për të njëjtën vepër (“ne bis in idem”) dhe të gjësë së gjykuar (resjudicata) janë të pabazuara. Për rrjedhojë, duke e parë të lidhur me këto pretendime, Gjykata vlerëson se nuk ka as cenim të parimit të sigurisë juridike.