Flotë të re pajisjesh për monitorimin e shoferëve, qindra gjoba çdo ditë
Ndërsa Shqipëria vazhdon të ketë një numër të lartë aksidentesh dhe gjithashtu qindra shoferë gjobiten çdo ditë në rrugët e vendit, Policia Rrugore ka hedhur në rrugë një flotë të re automjetesh më e pajisur me bazën logjistike bashkëkohore, makinën inteligjente dhe radarët automatikë. Kjo bëhet për të monitoruar qarkullimin rrugor me qëllim parandalimin e aksidenteve dhe rritjen e parametrave të sigurisë në rrugë. “Prej një jave, në të gjitha rrugët e vendit, këto mjete kanë skanuar shpejtësi deri në dyfish mbi normën e lejuar, në rrugët urbane dhe në ato nacionale. Shpejtësitë më të mëdha janë konstatuar gjatë orëve të mbrëmjeve dhe gjatë orëve të para të mëngjeseve”, sqaro Policia e Shtetit. Gjatë një jave, janë pezulluar 683 leje drejtimi, për shpejtësi mbi normat e lejuara. Janë vendosur 1610 masa administrative, po për shpejtësi mbi normat e lejuara, por pa sanksionin plotësues pezullim i lejes së drejtimit. Gjithashtu, janë evidentuar dhe ndaluar 233 automjete të shpallura “Alert”, kryesisht për shpejtësi, të evidentuara nga makina inteligjente. Drejtuesve të këtyre mjeteve u është pezulluar leja e drejtimit, si dhe janë ndëshkuar me masat administrative përkatëse. Janë evidentuar dhe ndëshkuar 22 drejtues mjetesh për gara shpejtësie. Janë evidentuar dhe ndëshkuar 431 drejtues mjetesh, për parakalime të rrezikshme në rrugë. Nga përpunimi që u kanë bërë operatorët pamjeve filmike të skanuara nga makina inteligjente, shumë drejtues mjetesh janë evidentuar në shkelje të dyfishtë ose të trefishtë. Përveç shpejtësisë së skanuar nga makina inteligjente, nga përpunimi i të dhënave ka rezultuar se drejtuesit nuk kishin vendosur rripin e sigurimit dhe/ose kishin përdorur edhe celularin gjatë drejtimit të automjeteve.