Budina: Në negociata me kompani gjermane për pajisjen e laboratorëve
Rozarka Budina, shefe e Departamentit të Stomatologjisë në universitetin “Luarasi”, u shpreh se studentët e këtij departamenti kanë kurrikulat me bashkëkohore, të përzgjedhura nga përvoja shqiptare dhe e vendeve fqinje dhe europiane. Ajo u shpreh se studentët janë shumë entuziastë për t’u futur në praktikë, ndërsa nuk mungojnë herë pas here aktivitetet shkencore, të cilët u japin mundësi që të bëjnë bashkë teorinë dhe praktikën. “Kurrikula është bashkëkohorë, e përzgjedhur nga përvoja shqiptare dhe e vendeve fqinje dhe europiane. Aktivitetet shkencore nuk kanë munguar, kemi pasur një të tillë para 2 muajve ku studentët ishin pjesë e temave shkencore, të cilët e morën me shumë qejf sepse bashkojnë mësimet e teorisë me praktikën shkencore. Do të jetë dhe një bazë për përgatitjen e tyre që kur të vijë fundi për të mbrojtur diplomën do të jenë të përgatitur. Ne i përgatitim që në vitin e parë me kërkimin shkencor”. Sa u përket pajisjeve laboratorike, Budina tha se universiteti “Luarasi” është në negocim me një kompani gjermane për pajisjen e laboratorëve paraklinikë dhe klinikë. “Jemi në negocim me një kompani gjermane për pajisjen e laboratorëve paraklinikë dhe klinikë, të cilat fillojnë nga mesi i vitit të tretë, por ne e kemi vënë punën në vijë, gjithë kabinetet do instalohen në ndërtesën kryesore të universitetit ‘Luarasi’, që është një pikë shumë e kapshme në qytetet. Pajisje shumë bashkëkohore, në vitin e dytë studentët do ushtrohen në modele dhe diku nga mesi i vitit të tretë do kalojnë në klinikë me pacientë, nën kujdesin e pedagogëve”, shtoi Budina. Ndërkohë, teknologjia në stomatologji evoluon me shpejtësi, shtoi shefja e Departamentit, duke shtuar se për të qenë koherentë, insistojnë në shkëmbime me universitete të huaja.