Turizëmmemushkonja,dështon tenderi për dezinsektimin
Situata e njëjtë edhe në plazhet e Durrësit, Divjakës dhe Velipojës Shëngjini “pushtohet” nga insektet pickuese. Pushuesit shprehen të shqetësuar për situatën: Nuk dalim dot shëtitje gjatë darkës
Rreth një muaj pas çeljes zyrtare të sezonit, turizmi në Shëngjin po përballet me problematika. Prania e insekteve, kryesisht mushkonjave, është kthyer në shqetësim për pushuesit, sidomos në orët e mbrëmjes. Shkak për këtë situatë është bërë mungesa e dezinsektimit për këtë vit. Pushuesit thonë se prania e madhe e mushkonjave është kthyer në një shqetësim mjaft të madh në këtë zonë bregdetare, duke kërkuar që të merren masa. “Mushkonjat janë shumë shqetësim këtë vit. Siç duket, nuk është dezinsektuar vendi dhe shumë mushkonja, sidomos gjatë orëve të mbrëmjes. E kemi për mall të dalim jashtë, sepse na sulmojnë mushkonjat. Nuk më duket aspak normale kjo situatë që është krijuar. Shteti duhet të marrë masa për dezinsektimin e ambientit për të eliminuar sadopak insektet, sepse kjo gjendje po e dëmton shumë sezonin turistik e po sjell largim të pushuesve dhe mosrikthim të tyre në vitet e ardhshme”, thotë një pushues nga Kosova. Të njëjtin shqetësim shprehin edhe Operatorët Turistikë në
Shëngjin, të cilët thonë se situata e krijuar është mjaft problematike dhe po dëmton rëndë turizmin. “Mushkonjat janë bërë shumë problem. Këtë vit nuk kemi parë fare të dezinsektohet vendi. Nuk e di çfarë ka ndodhur këtë vit, por asgjë nuk është bërë. Mushkonjat janë bërë si bletë, duke sulmuar pushuesit. Sidomos në mbrëmje është shumë e vështirë të qëndrosh jashtë nga mushkonjat. Diçka e tillë po dëmton shumë turizmin, duke sjellë largimin e pushuesve. Ju bëj thirrje autoriteteve që të marrin masa dhe të bëjnë sa më parë dezinsektimin e të gjithë vijës bregdetare, siç ka ndodhur vitet e shkuara, si e vetmja mënyrë për të larguar sadopak insektet e ndryshme. Ne si biznes e kemi të pamundur të bëjmë dezinsektimin vetë, sepse ka kosto mjaft të lartë financiare”, thotë Bensik Sula, operator turistik në Shëngjin.
“MUSHKONJAT LARGOJNË PUSHUESIT”
Mungesa e dezinsektimit po largon pushuesit, thotë eksperti i turizmit, Leonard Seferi. “Prezenca e mushkonjave mendoj se është një problematikë mjaft e madhe për turizmin që po jep një ndikim mjaft negativ. Insektet po sulmojnë pushuesit dhe kjo po sjell largim të tyre, duke kërkuar destinacione të reja turistike. Autoritetet përgjegjëse duhet të veprojnë menjëherë për t’i dhënë zgjidhje kësaj problematike, duke dezinsektuar të gjithë vijën bregdetare, siç ndodh në të gjithë boten”, thotë Leonard Seferi, ekspert turizmi. Vitet e shkuara, dezinsektimit i zonave turistike është realizuar që në muajin maj, por këtë sezon një proces i tillë ende nuk ka ndodhur.