Ndryshon ligji i sigurimeve, pensionistët e vetëpunësuar përjashtohen nga kontributet
“Qëllimi është lehtësimi i këtyre personave nga barra e pagesës së kontributeve, të cilat nuk u njihen si periudhë sigurimi”
Pensionistët e vetëpunësuar do të përjashtohen nga pagesa e kontributeve shoqërore. Instituti i Sigurimeve Shoqërore ka vendosur të konkretizojë nismën, por pa përfshirë ata që janë të punësuar qoftë në sektorin privat apo shtetëror.
“Këshilli i Ministrave mund të vendos që përfituesit e pensionit të pleqërisë, të vetëpunësuar në sektorin privat, të tërheqin këstet mujore të pensionit dhe të përjashtohen nga pagesa e kontributeve të sigurimeve shoqërore, gjatë kohës së vetëpunësimit”, përcaktohet në draftin e hedhur për konsultim publik.
NDRYSHIMET
Janë rreth 1500 pensionistë të vetëpunësuar, të cilët krahas pensionit marrin edhe pagën në të njëjtën kohë paguajnë çdo muaj edhe sigurimet. Qeveria ka vendosur të çlirojë nga detyrimet këtë kategori, të cilët pas zyrtarizimit të ndryshimeve ligjore do të kenë mundësi që të marrin njëkohësisht pensionin dhe pagën pa paguar kontribute. “Qëllimi i këtij projektakti konsiston në përjashtimin e përfituesve të pensionit të pleqërisë të cilët vetëpunësohen në sektorin privat, pasi kanë fituar të drejtën për pension pleqërie, nga pagesa e kontributeve të sigurimeve shoqërore. Aktualisht, janë 1 484 përfitues të pensionit të pleqërisë të vetëpunësuar në sektorin privat të cilët paguajnë kontribute çdo muaj në masën 14,151,424 lekë, të cilat kalojnë në fondin e sigurimeve shoqërore. Shuma 169,817,088 lekë në vit me hyrjen në fuqi të këtyre ndryshimeve do të zbritet nga të ardhurat në fondin e sigurimeve shoqërore”, thuhet në relacion.
SKEMA
Derdhja e kontributeve nga ana e pensionistëve që vijojnë të jenë pjesë e tregut të punës ka qenë herë pas herë
temë diskutimi. E fundit herë që u soll në vëmendje ishte përmes formularëve të këshillimit kombëtar, në fillim të këtij viti. Në relacion thuhet se pjesa më e madhe e të anketuarve janë shprehur në mbështetje të nismës, ndaj pritet që qeveria të shkojë gradualisht drejt përjashtmit nga sigurimet për të gjitha kategoritë e pensionistëve që vazhdojnë punojnë. “Përmes nismës së Këshillimit Kombëtar qytetarëve ju kërkua të jepnin mendim, në lidhje me faktin nëse pensionistët të cilët vetëpunësohen në sektorin privat duhet të përjashtohen nga pagesa e kontributeve të detyrueshme për sigurime shoqërore. Nga rezultatet e kësaj nisme evidentohet fakti se 66% e qytetarëve kanë dhënë përgjigje pozitive. Me qëllim shmangien e detyrimit për pagesën e kontributeve të sigurimeve shoqërore të personave, të cilët përfitojnë pensionin e pleqërisë dhe vetëpunësohen në sektorin privat, duke qenë se atyre
nuk u njihet koha e vetëpunësimit si periudhë sigurimi. Në këtë kuptim, efekti i pritshëm i projektaktit është lehtësimi i këtyre personave nga barra e pagesës së kontributeve të cilat deri më sot nuk u njihen si periudhë sigurimi”, theksohet në relacion. Aktualisht, personat të cilët kanë mbushur moshën e daljes në pension, por që nuk e kanë ndërprerë kontratën e punës, mund të përfitojnë 6 për qind shtesë pensioni për çdo vit pune. Por, për këtë duhet që të heqin dorë nga pensioni. Thënë ndryshe, gjatë kohës që janë në punë, të marrin vetëm rrogën, dhe në momentin që shkëpusin kontratën, marrin pensionin dhe shtesën 6 për qind në vit. “I siguruari, i cili ka plotësuar kushtet për pension pleqërie, sipas nenit 92 të këtij ligji, merr shtesë në masën 0.5 për qind të pensionit për çdo muaj që shtyn datën e daljes në pension dhe vazhdon të paguajë kontribute”, thuhet në ligj.