Konferenca e përbashkët, kreu i Grupit të PS: Mbledhja do të zhvillohet javën e ardhshme
Balla: Qeveria ka meritën e pazëvendësueshme për përmbushjen e detyrimeve Rama, apel Maqedonisë: “Vëllezër, pranojeni propozimin francez”. Kovaçevski: “Vendimin për të ardhmen, do ta marrim bashkërisht”
Kreu i Grupit Parlamentar socialist, Taulant Balla, e mori enkas fjalën dje në Parlamentin shqiptar jashtë rendit të ditës për të njoftuar se, sipas tij, javën e ardhshme mbahet konferenca e përbashkët Shqipëri-be.
Ai njoftoi se në Samitin e NATO-S u arrit dakordësia politike për të zhvilluar Konferencën e Parë Ndërqeveritare me Shqipërinë gjatë javës së ardhshme. Nga foltorja e Kuvendit, Balla u shpreh se është arritur një dakordësi e plotë mes 27 vendeve anëtare të Be-së për çështjen e integrimit të Shqipërisë. “Kërkova fjalën për të ndarë me ju një lajm më se të mirë, ndoshta më i rëndësishmi këto 30 vite për sa i përket rrugëtimit tonë në BE që ka të bëjë me faktin se ka një dakordësi të plotë mes 27 endeve anëtare të Be-së për të mbajtur javën e ardhshme Konferencën e Parë Ndërqeveritare mes Shqipërisë dhe Be-së. Është një moment i rëndësishëm, kjo pas komunikimeve disaorëshe të parlamenteve anëtare. Sapo është larguar edhe ambasadori i Çekisë, me të cilin pata mundësinë të zhvilloj një komunikim. Dakordësia politike tashmë është arritur dhe mbajtja e Konferencës Ndërqeveritare tashmë javën e ardhshme është fakt”, tha Balla. Sipas tij, zhvillimi i Konferencës së Parë Ndërqeveritare është kulmim i kontributeve të shumë qeverive. “Kjo qeveri ka meritën e pazëvendësueshme për përmbushjen e detyrimeve. Shqipëria po negocion dhe do të negociojë për t’u bashkuar në BE. Java e ardhshme do të jetë solemne në përgjegjësinë që kemi për të punuar. Duke pasur parasysh edhe detyrat që ka Kuvendi në këtë proces. Ne kemi udhëheqësinë e këtij procesi. Për sa kohë negociatat përfshijnë legjislacionin. Fillimi i bisedimeve për anëtarësim është fitore për shqiptarët. Urojmë që minutat dhe orët në vijim të jenë vendimtare për
mbajtjen e Konferencën e Parë Ndërqeveritare. Ata që javën e ardhshme duan të protestojnë, nuk e kanë me ne, por me qytetarët”, vijoi kreu i Grupit të Ps-së.
APELI I KRYEMINISTRIT RAMA
Më herët, Kryeministri Rama, përmes një postimi në “Twitter”, i kërkoi Maqedonisë së Veriut që të pranonte propozimin e Presidentit francez, Macron, për zgjidhjen e ngërçit me Bullgarinë. “Propozimi i fundit francez, i cili është edhe përfundimtari, i jep Maqedonisë së Veriut mundësinë e një pranimi pa rezervë dhe hap
rrugën e nisjes zyrtare të negociatave për anëtarësimin e të dyja vendeve në Bashkimin Europian! Vëllezërve maqedonas & shqiptarë në MV u them: Pranojeni!”, shkroi Rama në “Twitter”. Por pasi propozimi francez mbërriti në Maqedoninë e Veriut, reagoi Kryeministri i vendit, Dimitar Kovaçevski, i cili u shpreh se kjo çështje do të kalojë në proces të gjerë konsultimi. “Ky propozim, përgatitja e të cilit merr parasysh qëndrimet dhe kërkesat tona, do të kalojë në një proces të gjerë konsultimi. Konsultimet në ditët në vijim do të mbahen në qeveri, parti politike, President të Shtetit,
Parlament, si dhe me sektorin civil, ekspertët dhe publikun e gjerë në vend. Vendimi në lidhje me propozimin do të merret pas këtyre konsultimeve. Ashtu siç premtuam edhe kundër spekulimeve të opozitës, vendimin për të ardhmen tonë do ta marrim bashkërisht, sipas interesave strategjike të vendit dhe të gjithë qytetarëve tanë. I shpreh mirënjohjen time Presidentit Macron dhe Presidencës franceze për përpjekjet e tyre për të kapërcyer pengesat dhe për të ruajtur besueshmërinë europiane në Ballkan”, thuhej në reagimin e qeverisë franceze.