Balla: Më 7 korrik miratohet rezoluta për Srebrenicën
“Kuvendi dënon mohimin publikisht të gjenocidit të kryer në Srebrenicë” Kreu i Grupit të PS: Kemi ftuar zyrtarë të Bosnje-hercegovinës të jenë në Kuvend! Do sjellim edhe dokumentin për krimet në Kosovë
Kryetari i Grupit Parlamentar të Ps-së, Taulant Balla, ka depozituar në Kuvend një draft-rezolutë “për kujtimin dhe nderimin e viktimave të gjenocidit në Srebrenicë”. Drafti pritet të miratohet në seancën parlamentare të 7 korrikut.
Në tekst thuhet se Kuvendi i Shqipërisë “konfirmon qëndrimin e Shqipërisë se mohimi i gjenocidit të kryer ndaj popullatës boshnjake në Srebrenicë nga forcat serbe të Bosnjës përbën shkelje të ligjit ndërkombëtar, nxit fenomenin e pandëshkueshmërisë ndaj krimeve të luftës, si dhe shkel mbi dinjitetin e më shumë se 8 mijë civilëve që u masakruan në Sreberenicë, të mbijetuarave dhe familjeve të tyre, por edhe ndaj rreth 10 mijë shqiptarëve të vrarë gjatë spastrimit etnik në Kosovë dhe 20 mijë grave të dhunuara nga regjimi serb i Slobodan Milosheviçit”. Në vijim të tekstit, draft-rezoluta parashikon dënimin e atyre që nuk e njohin masakrën e Srebrenicës. “Dënon fuqimisht çdo prirje dhe veprim për të mohuar publikisht me qëllim ose jo, gjenocidin e kryer në Srebrenicë, fshehjen e motiveve, lavdimin e autorëve, ideatorëve dhe mbështetësve të këtij gjenocidi, si dhe konsideron të papranueshme e tejet të rrezikshme vazhdimin dhe përshkallëzimin e retorikës politike nacionaliste, nxitjen e urrejtjes etnike si pasojë e mohimit të gjenocidit të kryer në Srebrenicë, masakrave dhe krimeve të tjera kundër njerëzimit kryer në të gjithë hapësirën e ish-jugosllavisë nga disa individë, grupime e aktorë politikë e mediatikë brenda e jashtë rajonit të Ballkanit”, thuhet në dokument.
FTESA
Draft-rezoluta për përkujtimin dhe nderimin e viktimave të gjenocidit në Srebrenicë u lajmërua nga kryetari i Grupit Parlamentar, Taulant Balla, i cili në një komunikim me mediat tha se janë ftuar edhe zyrtarë të Bosnje-hercegovinës. “Është një dokument që u referohet 3 rezolutave që ka miratuar
Parlamenti Europian. Sikurse e dini, PE ka shpallur 11 korrikun si datën e përkujtimit të gjenocidit në Srebrenicë dhe përmes diplomacisë parlamentare, kemi ftuar përfaqësues zyrtarë të Bosnje-hercegovinës që të jenë prezentë. Seanca do të zhvillohet më 7 korrik. Unë mendoj që solemniteti i kësaj seance që zhvillohet me 7 korrik. Shqipëria është anëtare e përkohshme e Këshillit të Sigurimit në OKB dhe në qëndrime konsekuente të qeverisë së Shqipërisë. Në dokument theksohet qartë qëndrimi i qeverisë shqiptare”, tha Balla. Ndërkohë, ai tha se së shpejti do të vijnë me një dokument edhe për luftën në Kosovë. “Dua t’ju informoj se dokumenti është punuar nga ekspertët më të mirë dhe në komunikim me institucionet zyrtare. Kuvendi i Shqipërisë nuk do të lejohet të përdoret për axhenda personale të dikujt tjetër dhe të luajnë për kredibilitet apo përfitime personale. Ne do të ecim me një axhendë më komplekse. Në ditët në vijim do të kemi një dokument tjetër që lidhet me luftën në Kosovë, me krimet në Kosovë”, vijoi Balla.