Vendos për gjyqtarët e prokurorët, SPAK çon në gjyq anëtaren e KPK
“Me një pagë, bleu apartamente e toka”, çfarë shkruhet në denoncim Etleda Çiftja akuzohet për falsifikim dokumentesh e fshehje të pasurisë. Dje “gjykonte” gjykatësin e Shkodrës
Ndërkohë që Etleda Çiftja merrte pjesë në seancat për rivlerësimin e gjyqtarëve dhe prokurorëve, Prokuroria Speciale kundër Korrupsionit dhe Krimit të Organizuar mbylli dosjen hetimore ndaj saj, duke e dërguar për gjykim.
Gjatë ditës së djeshme, Çiftja mori pjesë në seancën e vetingut për gjyqtarin e Shkodrës Andri Ymeri, i cili po vlerësohej nga anëtarja e Komisionit të Pavarur të Kualifikimit edhe për kriterin e pasurisë, pikërisht një nga akuzat, për të cilën akuzohet Etleda Çiftja nga SPAK.
DOSJA HETIMORE
Prokuroria e Posaçme tha se ka mbyllur hetimet për anëtaren e KPK-SË, Etleda Çiftja, duke ngritur ndaj saj dy akuza, atë të “Falsifikimit të dokumenteve” në formën e përdorimit dhe “Refuzim për deklarimin, mosdeklarimin, fshehja ose deklarimi i rremë i pasurive, interesave privatë të personave
të zgjedhur dhe nëpunësve publikë ose i çdo personi tjetër që ka detyrim ligjor për deklarim”. Pas hetimit të nisur vitin e shkuar, ka mbyllur hetimin paraprak dhe ka çuar dosjen për gjykim. “Nga hetimet e kryera, ka rezultuar e provuar tej dyshimit të arsyeshëm se e pandehura Etleda Çiftja, në deklaratën me nr. 14568 indeksi, datë dorëzimi 17.07.2017, ka kryer deklarim të rremë të pasurisë, e konkretisht në lidhje me burimin e blerjes së apartamentit të banimit, te dy parcelave tokë arë me sip. 1450 m2 dhe me sip. 3440 m2, mënyrën e fitimit të pronësisë për dy sipërfaqet e tokave arë si dhe në lidhje me qëllimin e marrjes së një kredie pranë ish-”banka Emporiki–shqipëri sh.a”.
Gjithashtu, e pandehura Etleda Çiftja ka dorëzuar pranë ILDKPKI, një kontratë me përmbajtje të falsifikuar, referuar çmimit të pasqyruar në të, provuar tej çdo dyshimi të arsyeshëm, pasi kjo kontratë nuk përputhet me atë të gjendur pranë arkivit të zyrës noteriale ku është përpiluar dhe pranë ASHKSË në momentin e regjistrimit të pasurisë, për të cilën është
lidhur kjo kontratë. Gjithashtu, kjo kontratë përmban të dhëna të rreme edhe në lidhje me vetë veprimin e pasqyruar në të, pra shitblerjen e parcelës tokë arë”, thuhet në njoftimin e SPAK.
DENONCIMI
Etleda Çiftja është anëtarja e tretë e institucioneve të vetingut që procedohet penalisht dhe merret e pandehur nga SPAK. Një vit më parë, pra më 26 qershor 2021, Shoqata e Avokatëve Antikorrupsion denoncoi në Prokurorinë Speciale anëtaren e Komisionit të Pavarur të Kualifikimit, duke e akuzuar atë për falsifikim dokumentesh dhe fshehje të ardhurash. “Me pagën si
ndihmëse ligjore në zyrë avokatie pa emër dhe këshilltare pranë subjektit..., ka siguruar të ardhura për të përballuar jo vetëm shpenzimet e jetesës, por edhe ka kursyer personalisht prej saj vlerën prej 3.000.000 lekësh të rinj dhe ½ vlerë nga shuma prej 42 864 USD, si dhe ka paguar këstet e kredisë. Sa më sipër, deklarimi i saj krijon dyshime të forta mbi burimin e pajustifikuar të krijimit të pasurive të deklaruara nga znj. Çiftja, fakt i cili përbën elementet e veprës penale ‘Fshehja e të ardhurave’ dhe ‘Falsifikim i dokumenteve’”, thuhet në padinë e bërë nga avokatët pranë SPAK.