Largimi i mjekëve në Gjermani, Vasili- Ramës: Mos vidh, por rriti pagat
Deputeti i PL reagon pas deklaratave të Kryeministrit: Je dishepull i antishkencës dhe shkollëpakësisë
Nënkryetari i Partisë së Lirisë, Petrit Vasili, reagoi dje pas deklaratave të Kryeministrit Edi Rama për largimin e mjekëve nga vendi ynë, duke i kujtuar se zgjidhja është rritja e pagave të tyre dhe të heqë dorë nga vjedhja që po u bën shqiptarëve.
Në një postim në “Facebook”, Vasili i bën thirrje Kryeministrit që të rrisë pagat e mjekëve dhe të mos vjedhë paratë publike, si një zgjidhje për të parandaluar largimin e mjekëve. “Shkollëpak mos vidh më dhe rrit rrogat, se vetëm kështu nuk ikin mjekët! Ka disa javë që thotë se mjeket që të formohen në universitet paguajnë vetëm 1/ 16 e asaj që paguan shteti dhe për këtë arsye duhet të mbahen rob dhe të mos lëvizin nga vendi. Rama si dishepull i shkollëpakësisë dhe antishkencës ngado që shkon zbraz injorancën e tij proverbiale. Këtë idiotësi zbrazi edhe në Gjermani. Është e qartë që ndonjë ‘ shejtan budalla’, që tallet me të, ia ka futur në mendjen e varfër këtij Ramës këtë gomarllëkun e 1/ 16 dhe ky e broçkullit ngado që shkon, si një gjetje të madhe. Çdo njeri që i ka kryer si duhet 8 klasë shkollë e ka shumë të lehtë përgjigjen për këtë budallëkun e Ramës. Këto 15/ 16 që paguhen nga dalin? Mos dalin nga xhepi i Ramës? Po jo mo jo. Janë taksat, që paguajnë shqiptarët për të pasur universitete, shkolla, spitale dhe plot shërbime të tjera. Pra, o shkollëpak, nuk i paguan ti 15/ 16, por i paguajnë vetë shqiptarët për shkollimin e tyre. Ndaj anë e mbanë Evropës, universitetet shtetërore financohen nga shteti dhe studentët paguajnë shifra simbolike ose edhe nuk paguajnë fare. Ndaj shkollëpak mos grabit më miliarda euro me inceneratorë, koncesione e tenderë etj., rrit rrogat e mjekëve, financo kërkimin shkencor, pedagogët dhe ndihmo studentët e lëri këto budallëqe, që ngjajnë me diktaturat idiote. Shkollëpak sot në këtë 7 mars gjete të thuash këto budallëqe në mes të Gjermanisë. Shkollëpak mos vidh
më dhe financo universitetet e rrogat e mjekëve se vetëm kështu nuk ikin mjekët, se nuk zgjidhen me izolime prej budallai këto punë në kohën e pluralizmit dhe demokracisë. Ehu gjeta dhe unë kujt ti flas, po kupton ky nga arsyeja dhe logjika me trurin e tij të atrofizuar”, shprehet deputeti i PL- së, Petrit Vasili. Kryeministri Edi Rama dhe kancelari, Olf Scholz, teksa ishin në një konferencë për mediat pas takimit të tyre në Berlin, u pyetën nga gazetarët në lidhjen me fenomenin e largimit të mjekëve dhe infermierëve nga Shqipëria në Gjermani. Rama u shpreh se këtë çështje e kanë diskutuar dhe po shihet zgjidhja nëpërmjet një rrugë Evropiane. “Po, e kemi diskutuar edhe këtë çështje. Ne nuk mund t’i kërkojmë Gjermanisë që të ndalojë lëvizjen e lirë të kapitalit njerëzor dhe të ndalojë lëvizjen e lirë të atyre që nga Shqipëria duan të provojnë veten në tregjet e Gjermanisë. Kemi diskutuar se si duhet të gjejmë mekanizma që Shqipëria të mos jetë financuesi i drejtpërdrejtë i sistemit të shëndetësisë gjermane. Ndërkohë që i kam shpjeguar kancelarit se studentët tanë kanë paguar 1/ 16 e kostos, ndërkohë që të gjithë pjesën tjetër e paguan qeveria. Këto janë tema të kohës, jemi në një kohë kur të gjitha vendet kanë nevojë për forcë pune. Është e nevojshme që të gjejmë një rrugë evropiane”, deklaroi Rama.