Koncesioni i sterilizimit, Vokshi: Pse nuk hetohet ish- ministri Ilir Beqja
PD- ja denoncoi dje se padia për koncesionin e sterilizimeve prej 100 milion USD, “po fle” në sirtarët e Prokurorisë. Në një deklaratë për mediat, deputetja e PD- së, Albana Vokshi shprehet se “SPAK e regjistroi në vitin 2020 procedimin penal për veprat penale të pretenduara në kallëzimin penal. Interesimit mediatik i janë përgjigjur me frazën: po vijojnë hetimet”. Vokshi denoncoi se në lidhje me këtë procedim penal, Prokuroria “nuk po heton ish- ministrin Ilir Beqja”. Deputetja demokrate, lëshoi akuza në drejtim të SPAK, ndërsa pohoi se dosjet e ministrave konservohen. Vokshi pyeti se pse SPAK nuk e heton ish- ministrin Ilir Beqja, për të cilin është depozituar një padi që para tri vitesh për koncesionin e sterilizimeve prej 100 milionë USD. “Kallëzimi në fjalë identifikon ish- ministrin Ilir Beqja, nënshkrues i kontratës famëkeqe koncesionare të sterilizimit të pajisjeve kirurgjikale, që i kushton buxhetit të shtetit 100 milionë USD. Në kallëzim ngrihen dyshime se zyrtarët e përfshirë në këtë kontratë kanë shkelur barazinë e
pjesëmarrësve në tenderë, shpërdoruar detyrën, kryer korrupsion pasiv, si dhe i kanë sjellë dëm financiar shtetit në vlera të mëdha. Kanë kaluar tre vjet dhe Ilir Beqja, në atë që Partia Demokratike e konsideron korrupsion të hapur, shpërdorim të fondeve shtetërore dhe të detyrës, as nuk është thirrur për t’u pyetur”, tha Vokshi. “Ka edhe një provë të re se si, SKAP- i i partisë, është kthyer në mburojë të korrupsionit të qeveritarëve hajdutë! Për të shkuar vetë te prova, i ftojmë qytetarët të shtrojnë disa pyetje? Pse SPAK nuk e heton ish- ministrin Ilir
Beqja, për të cilin është depozituar një padi që para tri vitesh për koncesionin e sterilizimeve prej 100 milionë USD? Pse SPAK nuk përgjigjet kur pyetet nga media nëse është regjistruar procedim penal kundër ndonjërit prej personave të përfshirë në dosje? Pse SPAK e zvarrit hetimin dhe konkludimin e tij, edhe pse ka marrë një kallëzim penal nga shoqëria civile, vetëm pak javë pasi struktura e Posaçme Anti- korrupsion u krijua? Përgjigja është e qartë dhe vetem një: SKAP- i i partisë ka si mision nga partia që e krijoi, mbrojtjen e ministrave dhe qeveritarëve të korruptuar. Çfarë pret SKAP- i, që të parashkruhen edhe veprat e tjera penale? Çfarë presim ne nga kjo drejtësi, që kundërshtarin politik të pushtetit e mban peng, kurse ministrin e partisë e çliron nga hetimet, duke i zvarritur ato derisa vepra penale të parashkruhet? Prova është e qartë: SKAPi i partisë ka si detyrë të mbulojë vjedhjet e Edi Ramës dhe qeverisë së tij”, shprehet deputetja e PD- së.