Yuri Kim takon përfaqësuesit e partive: Bëni zgjedhje me standarde si aleatë të NATO- s
“Shteti të garantojë të drejtën për të zgjedhur lirisht dhe në fshehtësi” Zgjedhjet, Ambasada zbardh takimet me Metën, Gjiknuri dhe Alibeajn: Zgjidhni kandidatë të pastër, zbatoni rekomandimet e ODIHR- it
SHBA- ja përmes përfaqësueses së tyre në Tiranë Yuri Kim kërkon nga drejtuesit e partive politike që të angazhohen për një proces zgjedhor sipas standardeve ndërkombëtare.
Ambasadorja amerikane takoi dje Damian Gjiknurin e PS- së, Ilir Metën e PL- së dhe Enkeljed Alibeajn e PD- së. Në postimin e hedhur në “Facebook” nga ambasada amerikane shkruhet se gjatë diskutimit u nënvizua rëndësia e zhvillimit të aktiviteteve në mënyrë të ndershme, transparente dhe të rregullt, në përputhje me ligjin shqiptar dhe standardet ndërkombëtare. Takimet e Kim ishin me Damian Gjiknurin nga PS, Enkelejd Alibeajn nga PD dhe Ilir Metën nga Partia e Lirisë. Ambasadorja e SHBA njofton se i garantuan që do të verifikojnë figurën e kandidatëve që do të garojnë për kryetarë Bashkie që të jenë të pastër dhe të përmbushin kërkesat e ligjit si dhe i kujtoi vëzhgimet dhe rekomandimet e mëparshme të ODIHR- it. Kim rikujtoi raportet e mëparshme e ODIHR- it, ku më e fundit i përket përfundimit të zgjedhjeve parlamentare të prillit 2021. “Ndërsa Shqipëria përgatitet për zgjedhjet vendore të 14 majit, ambasadorja Kim u takua me drejtues të PS, PD dhe PL për të nënvizuar rëndësinë e zhvillimit të aktiviteteve në mënyrë të ndershme, transparente dhe të rregullt, në përputhje me ligjin shqiptar dhe standardet ndërkombëtare. Ajo iu kujtoi atyre vëzhgimet dhe rekomandimet e raporteve të mëparshme e ODIHR- it. Për shembull, në raportin përfundimtar për zgjedhjet parlamentare të prillit 2021, rekomandimet e ODIHR përfshinin si më poshtë: Shteti duhet të garantojë të drejtën për të zgjedhur lirisht dhe në fshehtësi. Çdo formë presioni për të zbuluar nëse dhe si kanë votuar njerëzit duhet të parandalohet. Agjencitë ligjzbatuese duhet të intensifikojnë përpjekjet për të identifikuar, hetuar dhe ndjekur penalisht rastet e blerjes së votës. Qytetarët duhet të nxiten të raportojnë dhe të japin fakte për çfarëdo blerje votash apo presioni. Shqipëria duhet të garantojë sigurinë e të dhënave personale të qytetarëve. Institucionet përkatëse duhet të hetojnë tërësisht dhe të ndëshkojnë çdo shkelje që ndikon në besimin e publikut në procesin zgjedhor. Legjislacioni duhet të ndryshohet për të siguruar që mediat të jenë në gjendje të mbulojnë në mënyrë të pavarur aktivitetet e konkurruesve në zgjedhje me synimin për të kufizuar përdorimin në lajme të materialeve të prodhuara nga partitë”, thuhet në njoftimin e ambasadës amerikane. Drejtuesit e partive konfirmuan gjithashtu se do të shqyrtojnë kandidatët përkatës për t’u siguruar që ata përmbushin kërkesat e ligjit si dhe pritshmëritë e votuesve shqiptarë për kandidatë të pastër. Ambasada siguroi se “SHBA- ja do të vazhdojnë të punojnë ngushtë me votuesit, autoritetet, partitë, shoqërinë civile, median dhe të tjerë në mbështetje të një procesi zgjedhor që pasqyron statusin e Shqipërisë si aleate në NATO dhe aspirante për t’u anëtarësuar në BE”.