Vendimi për vulën e PD, KLGJ: Thirrjet për vetëgjyqësi, antikushtetuese
Këshilli i Lartë Gjyqësor e cilësoi dje si të papranueshme gjuhën e përdorur, kundrejt gjyqtarëve të Gjykatës së Apelit, të cilët vendosën që t’i jepnin vulën e Partisë Demokratike, Enkelejd Alibeajt. KLGJ- ja shkruan se gjuha e urrejtjes kundër gjyqtarëve është shqetësuese dhe e papranueshme, ndërsa thirrjet publike për vetëgjyqësi i konsideron kundër rendit kushtetues mbi bazën e të cilit funksionon shteti i së drejtës. Ndër të tjera shkruan se liria e shprehjes e garantuar nga Kushtetuta e Republikës së Shqipërisë, nuk mbron në asnjë rast gjuhën e urrejtjes apo thirrjet për dhunë. “Gjuha e urrejtjes kundër gjyqtarëve është shqetësuese dhe e papranueshme. Thirrjet publike për vetëgjyqësi, ndaj një akti të pushtetit gjyqësor, pavarësisht mos dakordësisë me të, janë haptazi kundër rendit kushtetues, mbi bazën e të cilit funksionon shteti i së drejtës. Aludimet për ‘ kapje’ të gjyqtarëve, referojnë elementë të korrupsionit që, në mungesë të fakteve, minojnë rëndë besimin te drejtësia dhe autoritetin e pushtetit gjyqësor”, thuhet në reagim. KLGJ- ja shprehet se akuza të tilla nuk janë kurrsesi një e drejtë që e ofron liria e shprehjes, duke theksuar se për aq kohë sa nuk bien dakord me vendimin e
Gjykatës, mund ta ankimojnë në Gjykatën e Lartë, por kurrsesi të mos përbaltin figurën e togave të zeza. “Liria e shprehjes e garantuar nga Kushtetuta e Republikës së Shqipërisë, nuk mbron në asnjë rast gjuhën e urrejtjes apo thirrjet për dhunë. Për nga natyra e vet, veprimtaria gjyqësore shkakton pakënaqësi ndaj njërës apo tjetrës palë, por në një shtet të së drejtës, mjeti ligjor për të kundërshtuar një vendim gjyqësor është ankimi në një gjykatë më të lartë, sipas legjislacionit në fuqi, jo përbaltja e gjykatës, apo e gjyqtarit”, thuhet në njoftim. KLGJ- ja iu bën thirrje që kushdo që ka dijeni për një sjellje që shkon në shkelje të Kushtetutës të një gjyqtari, ta referojë si çështje Inspektorit të Lartë të Drejtësisë, dhe do të jenë institucionet ato që do të marrin një vendim për këdo që kryen shkelje.