Vasili: Kryeministri tërhiqet nga shpërblimi për pensionistët
Nënkryetari i PL, akuza qeverisë për mungesën e vëmendjes ndaj shtresave në nevojë “Vazhdon pa u ndalur vjedhja me inceneratorët që nuk ekzistojnë, me koncesione dhe tendera hajdutësh pa fund, për pensionistët nuk ka lekë”
Nënkryetari i Partisë së Lirisë, Petrit Vasili, ka akuzuar qeverinë për tërheqjen nga shpërblimi i pensionistëve. Nëpërmjet një postimi në “Facebook”, Vasili ka shkruar se Kryeministri Edi Rama është tërhequr nga shpërblimi, pasi paratë i ka për inceneratorët.
Vasili shkruan se, “Edi Rama tërhiqet nga shpërblimi për pensionistët, se lekët i ka për inceneratorët! Qeveria ka deklaruar hapur se nuk ka lekë për shpërblim për pensionistët në prill. Ministrja e Financave tha dje pas mbledhjes së qeverise se: Sa u përket pensioneve kemi një politikë të konsoliduar në bazë të inflacionit. Nuk kemi përcaktuar një politikë të dhënies së shpërblimit në prill”, u shpreh Ibrahimi. Qindra mijëra pensionistë jetojnë në kufijtë e varfërisë dhe mbijetesës për shkak të pensioneve shumë të ulëta”. Nënkryetari i PL- së shkruan se me mijëra pensionistë përballën çdo ditë me çmime të larta dhe për të cilën nuk marrin asnjë ndihmë nga qeveria. Pensionistët nuk mund të blejnë dot as ilaçet dhe as ushqimet. Jetesa e tyre është bërë e papërballueshme.
“Qindra mijëra pensionistë përballen me çmimet shumë të larta pa asnjë ndihmë nga qeveria, e cila u tall me ta duke dhënë 7- 8 mijë lekë të vjetra ndihme për pak muaj. Qindra mijëra pensionistë me vështirësi shumë të mëdha mbulojnë nevojat për ushqime dhe ilaçe. Qindra mijëra pensionistë bëjnë një jetë shumë të izoluar për shkak se nuk mund të bëjnë as pushime dhe asgjë tjetër se nuk e përballojnë ekonomikisht. Ndërkohë që vazhdon pa u ndalur vjedhja me inceneratorët që nuk ekzistojnë, me koncesione dhe tendera hajdutësh pa fund, për pensionistët nuk ka lekë. Ndërkohë që Kosova e Maqedonia kanë mbështetur me shpërblime dhjetëra herë më të larta sesa qeveria e Edi Ramës. Atje qeverisin kryeministra të përgjegjshëm, ndërsa këtu qeveris një kryeministër grabitqar i pangopur”, ka shkruar Vasili.
DEKLARATA E RAMËS
Ka qenë një deklaratë e Kryeministrit Edi Rama në fillim të këtij viti, i cili ka shkaktuar këtë pakënaqësi te pensionistët. Kujtojmë se Kryeministri Edi Rama bëri të ditur se në muajin prill do të programojnë një tjetër bonus për pensionistët. Përmes një postimi në faqen e vet në “Facebook” Rama shprehej se nisma ka për qëllim të ulë barrën e inflacionit të luftës për këtë shtresë. “Të gjithë pensionistët po marrin këto ditë sipas premtimit bonusin e Pakos së Madhe dhe urojmë ta kenë sa më të mbarë e me shëndet të plotë, vitin që sapo ka nisur. Me marrjen e këstit të parë të taksës së jashtëzakonshme mbi eksportuesit e energjisë në muajin prill, do të programojmë një tjetër bonus për pensionistët, që barra e inflacioni i luftës për ta të vazhdojë të jetë sa më pak e ndjeshme”, shkroi Rama në “Facebook”. Më shumë se 8 miliardë lekë të reja është paketa mbështetëse që Qeveria ka vendosur të miratojë për t’i qëndruar pranë 1 milionë shqiptarëve dhe për të zbutur efektet e rritjes së çmimeve dhe inflacionit të lartë për shkak edhe të luftës në Ukrainë. Nga kjo paketë do të përfitojnë 695 mijë pensionistë nga 8 000 lekë të reja.