Pjesë e grupit që merrej me kokainë e dokumente të falsifikuara,

Policia e Shkodrës ka bërë me dije se ka kryer një operacion masiv ditëve të fundit në qytet dhe rrethina për të çuar në pranga persona me rekorde kriminale. Bëhet fjalë kryesisht për trafikantë të lëndëve narkotike, ku një prej tyre është vënë në pranga në kuadër të grupit kriminal, njoftoi dje Policia e qytetit verior.

Sipas të dhënave, një 32vjeçar është arrestuar nga Policia në Shkodër si pjesë e grupit që u godit në prill të 2022 e që merrej me shpërndarjen e lëndëve narkotike kokainë dhe kanabis, si dhe falsifikimin e dokumenteve. Më herët, Policia ka arrestuar tre shtetas të këtij grupi. Shërbimet e Forcës së Posaçme "Shqiponja" dhe ato të Seksionit për Hetimin e Narkotikëve, të DVP Shkodër, në vijim të punës për kapjen e shtetasve të shpallur në kërkim, si dhe me mbështetjen e inteligjencës informative, për vendndodhjen e një shtetasi të kërkuar në kuadër të operacionit "Triple", kanë lokalizuar në lagjen "Liria", kanë kapur dhe vënë në pranga shtetasin: Nikollë Livadhi, 32 vjeç, banues në Shkodër.

"Ndaj 32- vjeçarit, Gjykata e Rrethit Gjyqësor Shkodër ka caktuar masën e sigurisë ' Arrest në burg', për veprat penale ' Prodhimi dhe shitja e narkotikëve', ' Falsifikimi i dokumenteve' dhe ' Falsifikimi i letërnjoftimeve, i pasaportave ose i vizave'. Shtetasi N. L. u shpall në kërkim në kuadër të operacionit policor të koduar ' Triple', të zhvilluar në prill të vitit të shkuar, pasi në bashkëpunim me 3 shtetas të tjerë ( të vënë në pranga), ushtronin në formën e grupit, veprimtaritë kriminale të shpërndarjes së lëndëve narkotike kokainë dhe kanabis dhe falsifikimit të dokumenteve. Nga ky operacion, u sekuestruan sasi lënde narkotike kokainë, 4.3 kg kanabis dhe disa dokumente false", njoftoi Policia. Materialet procedurale i kaluan Prokurorisë pranë Gjykatës së Rrethit Gjyqësor Shkodër për veprime të mëtejshme.